मानोरा (जि.वाशिम) : नवीन चारचाकी वाहन घेण्यासाठी माहेरवरून एक लाख रुपये आण, असा तगादा लाऊन विवाहितेचा शारीरिक व मानसीक छळ सासरची मंडळी करित असल्याची तक्रार फिर्यादीने दिली. त्यावरून मानोरा पोलिसांनी सासरच्या आठ जणांविरुद्ध गुन्हे दाखल केले आहेत.

पोलिस सूत्रांकडून प्राप्त माहितीनुसार सविस्तर वृत्त असे की, फिर्यादी महिलेच्या जबानी रिपोर्टप्रमाणे, लग्न झाले तेंव्हापासून सासरची मंडळी शारिरिक व मानसीक छळ करीत असूनही त्याकडे ती दुर्लक्ष करीत सुखाने संसार करीत होती. दोन मुले झाली तरीही त्रास वाढला. पती सूरज गायकवाड रा.अंतरगाव, ता.दारव्हा हा मोटर ड्रायविंगचे काम करीत असल्याने त्याला स्वतःची नवीन चारचाकी गाडी घ्यायची आहे.

त्यासाठी माहेरवरून एक लाख रुपये आण, असा तगादा लाऊन पतीसह अन्य सात जणांकडून मारहाण केली जात होती. त्यामुळे त्रास सहन होत नव्हता, अशा जबानी रिपोर्ट व महिला समुपदेशन केंद्र कारंजा यांचे अहवालावरून मानोरा पोलिसांनी पती सुरज अन्य सात जणांविरुद्ध कलम ४९८, ५०४, ५०६ भादवीप्रमाणे गुन्हा दाखल केला. सदर प्रकरणाचा अधिक तपास मानोरा पोलिस करीत आहेत.