शेगाव : कोरोना नियंत्रणात आल्याने राज्य सरकारने (ता.१) निर्बंध मागे घेतले आहेत. मात्र, येथील संत गजानन महाराज संस्थानमध्ये १० एप्रिलपर्यंत ई - पासद्वारेच दर्शन सुविधा सुरु राहणार आहे . असे माहितीपत्रक संस्थानच्यावतीने प्रसारीत करण्यात आले आहे.कोरोना प्रादुर्भाव कमी झाला असून, राज्यभरातील परिस्थिती सुधारत असल्याने राज्य सरकारने १ एप्रिलपासून कोरोना प्रतिबंधक नियम हटविले आहेत. ही नागरिकांसाठी दिलासादायक बाब आहे. परंतु, संत श्री गजानन महाराज संस्थानने ई - पास दर्शन बंद केलेले नाही.

१० एप्रिलपर्यंत ई - दर्शन पासची नोंदणी झालेली आहे. त्यामुळे १० एप्रिलपर्यंत ई - पासद्वारेच दर्शन सुविधा उपलब्ध असणार आहे. त्यानंतर ११ ते १३ एप्रिलपर्यंत मंदिरातील अंतर्गत व्यवस्था पुर्ववत करण्यासाठी संत गजानन महाराज मंदिर दर्शनासाठी बंद राहील.१४ एप्रिलपासून खऱ्या अर्थाने ई - पास शिवाय दर्शन सुविधा सुरु होईल. तसेच २ ते १० एप्रिल या कालावधीत श्रीरामनवमी उत्‍सव येत असल्‍यामुळे श्री संस्‍थानच्‍या धार्मिक प्रथा-परंपरेनुसार उत्‍सव मर्यादीत स्‍वरुपात साजरा करण्यात येत आहे. भक्‍तनिवास व तेथील सोयी सुविधा मात्र, नेहमीप्रमाणे सुरु राहतील. उत्‍सवानिमित्‍त येणाऱ्या दिंड्यांमधील वारकऱ्यांची निवास व भोजनप्रसादाची व्‍यवस्‍था पुर्वीप्रमाणे विसावा संकुलात राहील, असे संस्थानच्यावतीने एका माहिती पत्रकाद्वारे सुचित करण्यात आले आहे.