पुणे : बांधकाम व्यावसायिक डी. एस. कुलकर्णी (डीएसके) यांच्या समोरील अडचणीत वाढच होत चालली आहे.  डीएसकेंचा पुण्यातील राहत्या बंगल्याचा सेंट्रल बँक ऑफ इंडियाकडून लिलाव करण्यात येणार आहे.  सेंट्रल बँक ऑफ इंडियाकडून डीएसकेंच्या पुण्यातील सेनापती बापट मार्गावरील राहत्या बंगल्याचा पुढील महिन्यात 8 मार्चला लिलाव होणार आहे. या बंगल्याची 'बेस प्राईस' 66 कोटी 39 लाख रुपये ठेवण्यात आली आहे. बँकेकडून या लिलावाची वृत्तपत्रात जाहिरात देखील देण्यात आली आहे.

पुण्यातील सेनापती बापट रस्त्यावरील चतुःश्रृंगी टेकडीला लागून असलेल्या या आलिशान बंगल्यात. टेकडीवरील नैसर्गिक धबधबा देखील आहे. गुंतवणूकदारांचे सुमारे 230 कोटी रुपये थकवल्याने डीएसकेंवर गुन्हा दाखल करण्यात आला आहे. शिवाय  मुंबई उच्च न्यायालयाकडून दोनदा दिलासा मिळाल्यांनतर डीएकेंनी मुंबई उच्च न्यायलयाची फसवणूक केल्याप्रकरणी त्यांचा पासपोर्ट जप्त करण्यात आला आहे. मुंबई उच्च न्यायालयाने जामीन नाकारल्यानंतर त्यांना दिल्लीतून अटक करण्यात आली होती.