पुणे : 'जिप्सी' म्हटल तरी आपल्या डोळ्यासमोर डोंगराळ, वाळवंट, खडकाळ प्रदेशातील रस्त्यांवर धावनारे लष्करातील वाहन उभे राहते. भारतीय लष्कराची ओळख असलेल्या या मारूती सुझुकी कंपनीच्या जिप्सी वाहनाचे उत्पादन बंद करण्यात आले आहे.
'रश्लेन' च्या एका अहवालानुसार कंपनीने इ-मेलद्वारे आपल्या वितरकांना या संदर्भातील माहिती दिली. 1985 साली पहिल्यांदा बाजारात आलेली जिप्सी 33 वर्षानंतर बंद करण्यात आली. कंपनीने जिप्सीचे उत्पादन तातडीने बंद केले आहे. यासाठी वितरकांनी ग्राहकांकडून नवीन वाहनाची नोंदणी करून घेऊ नयेत असे कंपनीकडून सांगण्यात आले आहे.

लोकांचा मोठा प्रतिसाद मिळालेले हे वाहन 1991 मध्ये पहिल्यांदा लष्कराने स्विकारले. त्यानंतर तब्बल 35 हजाराहून अधिक जिप्सी लष्कराच्या ताफ्यामध्ये सामील झाल्या. मागील वर्षी लष्कराकडून कंपनीला 4 हजार युनिट्सची सर्वाधिक ऑर्डर मिळाली होती.  अनेक चित्रपटांमध्ये भारतीय लष्करातील अधिकाऱ्यांचे वाहन म्हणून या गाडीचे चित्रीकरण करण्यात आले आहे. 500 किलो वजन घेऊन जाण्याची क्षमता असलेली ही गाडी कसल्याही खडकाळ रस्त्यांवर सहज चालत होती.