मुंबई: इंटरग्लोब एव्हिएशन या इंडिगो एअरलाईन्सच्या मूळ कंपनीने जूनअखेर सरलेल्या पहिल्या तिमाहीत 1,203 कोटी रुपयांचा नफा नोंदवला आहे. इंडिगोच्या नफ्यात विक्रमी 43 पट वाढ झाली आहे. मागील वर्षी याच कालावधीत इंडिगोने 27.80 कोटी रुपयांचा नफा कमावला होता. विश्लेषकांच्या अंदाजापेक्षा जास्त नफा कंपनीने कमावला आहे. विश्लेषकांनी 743 कोटी रुपयांच्या नफ्याचा अंदाज वर्तवला होता.

 इंडिगोचा महसूल 44.7 टक्क्यांनी वाढून 9,420.10 कोटी रुपयांवर पोचला आहे. 'प्रवासी वाहतूकीच्या महसूलातील वाढ आणि मालवाहतूकीतील सुधारणा यामुळे नफ्यात मोठी वाढ झाली आहे. या तिमाही निकालांनी आम्हाला आनंद झाला आहे कारण यामुळे आमच्या जलद गतीने विस्तारण्याच्या क्षमतेचे प्रदर्शन झाले आहे', असे मत इंडिगोचे मुख्य कार्यकारी अधिकारी रोन्जोय दत्ता यांनी व्यक्त केले आहे. सरलेल्या तिमाहीत कंपनीने 46.4 टक्के वाढीसह प्रवासी वाहतूकीतून 8,445.10 कोटी रुपये तर इतर पूरक व्यवसायातून 32.2 टक्क्यांच्या वाढीसह 902.60 कोटी रुपयांचा महसूल मिळवला आहे.

 इंडिगोला क्षमतेमध्ये दुसऱ्या तिमाहीत 28 टक्क्यांची आणि संपूर्ण आर्थिक वर्षात 30 टक्क्यांची वाढ अपेक्षित आहे. 30 जूनअखेर कंपनीकडे 17,337 कोटी रुपयांची रोकड शिल्लक आहे. इंडिगोवरील एकूण कर्ज 18,430 कोटी रुपये आहे.