कोळवडी (ता. वेल्हे) : मुख्यमंत्री ग्रामसडक योजनेंतर्गत वांगणी फाटा ते कोळवडी काळूबाई मंदिर या रस्त्याचे डांबरीकरण यंदा पूर्ण झाले; परंतु कातवडी येथील ओढ्यावरती नव्याने पूल बांधला आहे. त्या पुलाच्या दोन्ही बाजूने काही ठिकाणी रस्ता खचला आहे. ओढ्याच्या बाजूने जो भराव टाकला होता, तो पुराच्या पाण्याने वाहून गेला आहे. त्यामुळे नव्याने बांधलेल्या या पुलास धोका निर्माण झाला आहे. त्या ठिकाणी रस्ता तुटण्याची दाट शक्‍यता आहे. त्या पुलाच्या कठड्यापासून कातवडी पाणी पुरवठा विहिरीपर्यंत संरक्षण भिंत होणे गरजेचे आहे. हा रस्ता तुटला तर कोळवडी आणि कातवडी या दोन्ही गावचा संपर्क तुटेल आणि नागरिकांची गैरसोय होईल.