Success Mantra From Garud Puran : गरुडपुराण सनातन धर्मातल्या १८ महापुराणांपैकी एक आहे, यात भगवान विष्णू आणि त्यांचे वाहन गरुड यांचा संवाद आहे. गरुड पुराणातून आपल्याला बरेच काही शिकायला मिळते. यात जीवन, मृत्यू आणि मृत्यूनंतरच्या अनेक तथ्यांचे वर्णन आढळते. याशिवाय अशा बऱ्याच गोष्टी सांगण्यात आल्या आहेत ज्या अवलंबून आयुष्य अधिक चांगलं बनवता येउ शकतं.

जर तुम्हालाही आयुष्यात यशस्वी व्हायचं असेल तर गरुडपुराणातल्या या काही गोष्टींचा अवलंब करायला हवा. जाणून घेऊया.

स्वच्छ आणि सुगंधी कपडे घाला

जर तुम्हाला जीवनात श्रीमंत आणि सौभाग्यशाली बनायचं असेल तर स्वच्छ आणि सुगंधी कपडे घालावे. गरुड पुराणानुसार जे लोक घाण कपडे घालतात त्यांच्या जीवनात समृद्धी येत नाही. अशा लोकांच्या घरात कधीही लक्ष्मी टिकत नाही. शिवाय दरिद्रता वाढते. म्हणून कायम स्वच्छ, सुगंधी कपडे घालावे.

सर्व धर्मांचा सन्मान करावा

देवी, देवता किंवा धर्माचा अपमान करणाऱ्यांना आयुष्यात कधीच यश मिळत नाही. अशा व्यक्तींना कधी ना कधी उपरती होते आणि ते नर्कात जातात. त्यामुळे आपल्या आराध्य देवाबरोबरच सर्व धर्मांचा सन्मान करावा.

एकादशी व्रत

पुराणात एकादशी व्रत सांगण्यात आलं आहे. गरुड पुराणातही याची महिमा विस्ताराने सांगण्यात आली आहे. मान्यता आहे की, जी व्यक्ती एकादशीचा उपवास करते त्या व्यक्तीचे सर्व त्रास दूर होतात. जीवनात सुख-समृद्धी येते.

तुळशीचे महत्व

तुळशीला विष्णूप्रियापण म्हटलं जातं. तुळशीच्या पुजेने घरात लक्ष्मी येते. तुळशीचे महत्व सनातन धर्माच्या अनेक पुराणांमध्ये सांगण्यात आले आहे. तुळशी घरात असल्याने अनेक आजारांपासून मुक्तता मिळते.

डिस्क्लेमर : सदर लेख फक्त सामान्य माहितीसाठी आहे. सकाळ माध्यम समूह अशा कोणत्याही गोष्टींना पाठिंबा देत नाही. अधिक तपशीलांसाठी तुम्ही तज्ज्ञांचे मार्गदर्शन घेऊ शकता.