मुरगूड : गुलाल-खोबऱ्याची उधळण, हालगी, घुमकं, कैताळाची साथ व ‘घोडेश्‍वरच्या नावानं चांगभलं...’चा जयघोष करत महाराष्ट्र व कर्नाटकातील भाविकांचे श्रद्धास्थान कुरुकली (ता. कागल) येथील घोडेश्वरचा पालखी सोहळा झाला.

कुरुकलीतील घोडेश्वर मंदिराच्या (Ghodeshwar Temple Kurukali) यात्रेस घटस्थापनेपासून प्रारंभ झाला होता. यावेळीही पाचव्या माळेपासून जिल्ह्यासह महाराष्ट्रातील विविध ठिकाणचे तसेच कर्नाटकातील हजारो भाविकांनी घोडेश्वर डोंगरावर हजेरी लावून श्रींचे दर्शन घेतले. शनिवारी रात्री श्रींची उत्सवमूर्ती मिरवणुकीने गावातून मंदिरात नेण्यात आली.

यावेळी महिलांनी औक्षण करून देवदर्शनासाठी गर्दी केली होती. रविवारी सायंकाळी प्रतिवर्षीप्रमाणे कुस्ती मैदान झाले. जागरानिमित्त भाविकांना महाप्रसादाचे आयोजन केले होते. त्याचा लाभ भाविकांनी घेतला. सायंकाळी पालखी सोहळा झाला. कुरुकली, सुरुपली व बेनिक्रेतील मानाचे गावकरी आल्यानंतर पालखी सोहळ्यास प्रारंभ झाला. यावेळी उपस्थित महिलांनी घोडेकर.च्या नावानं चांगभलं..चा जयघोष करत पालखीवर गुलाल-खोबऱ्याची उधळण केली.

पुजारी अजित कांबळे यांनी गाऱ्हाणे घातले. मंदिर परिसरात खेळण्यांची, खाऊची दुकाने, मनोरंजनाची साधने दाखल झाली होती. यातून लाखो रुपयांची उलाढाल झाली. वाहतुकीची कोंडी टाळण्यासाठी मुरगूड पोलिस ठाणे व स्वराज्य रेस्क्यू फोर्स बिद्री यांनी बंदोबस्त ठेवला होता.