महाराष्ट्रात हनुमान चालिसा आणि धार्मिक स्थळांवर भोंगे यावर वाद सुरु असाताना उत्तर प्रदेशातील धार्मिक स्थळांवर लाऊडस्पीकरच्या वापराबाबत सरकारी नियमांचे पालन करण्यासाठी राज्यव्यापी मोहिमेत सुरू केली आहे, या अंतर्गत गेल्या 72 तासांत विविध समुदायांच्या धार्मिक स्थळांवरून तब्बल 6,031 लाऊडस्पीकर काढून टाकण्यात आले. याशिवाय 30,000 लाऊडस्पीकरचा आवाज निर्धारित डेसिबलच्या पातळीनुसार कमी करण्यात आला.

अलीकडेच मुख्यमंत्री योगी आदित्यनाथ यांनी अधिकार्‍यांना धार्मिक स्थळांवर पूर्वपरवानगीशिवाय पब्लिक अॅड्रेस सिस्टीम बसवली जाणार नाही याची काळजी घेण्याचे निर्देश दिले आणि ज्या ठिकाणी लाऊडस्पीकर वापरण्याची परवानगी आहे त्या ठिकाणीच्या बाहेर आवाज जाणार नाही याची काळजी घेण्याचे निर्देश दिले आहेत. प्रशांत कुमार, एडीजी (कायदा आणि सुव्यवस्था) यांनी सांगितले की सर्व एसएचओना आदेशाचे पालन करण्याचे आणि सार्वजनिक ठिकाणाहून लाऊडस्पीकर काढणे आणि आवाज कमी करण्याच्या प्रक्रियेवर देखरेख ठेवण्याचे निर्देश देण्यात आले आहेत.

या दरम्यान महाराष्ट्रात मनसे अध्यक्ष राज ठाकरे यांनी मशिदींवरील भोंग्याविषयी भूमिका घेत ३ तारखेपर्यंत मशिदींवरील भोंगे उतरवा असा अल्टिमेटम महाराष्ट्र सरकारला दिला आहे, अन्यथा मशिदींसमोर भोंगे लावून हनुमान चालिसा पठण केले जाईल असा इशारा दिला आहे.