नवी दिल्ली : भारताच्या पाच खलाशांचे नायजेरियातील चाच्यांनी अपहरण केले आहे. परराष्ट्रमंत्री सुषमा स्वराज यांनी ट्विटद्वारे याची माहिती दिली. शिवाय, नायजेरीयातील भारतीय उच्चायुक्तांना या खलाशांच्या सुटकेसाठी प्रयत्न करण्याचे आदेशही त्यांनी दिले आहेत.

स्वराज यांनी ही बाब अत्यंत गंभीरतेने घेतली असून, नायजेरियातील भारतीय उच्चायुक्तालयातील अधिकाऱ्यांना तेथील सरकारमधील सर्वोच्च पदावरील व्यक्तींशी बोलण्याच्या सूचना दिल्या आहेत. त्यांनी नायजेरियातील भारतीय राजदूत अभय ठाकूर यांनाही अहवाल देण्याचे आदेश दिले आहेत.

स्वराज यांनी ट्विटमध्ये म्हटले की, 'माध्यमांतील वृत्तातून मला याची माहिती समजली. त्यानंतर तत्काळ नायजेरीयातील भारतीय राजदूत अभय ठाकूर यांना याप्रकरणी लक्ष घालण्यास सांगण्यात आले आहे. नायजेरीयन सरकारशी चर्चा करुन या पाचही जणांच्या सुटकेसाठी प्रयत्न करण्याच्या सुचनाही त्यांना देण्यात आल्या आहेत. शिवाय, या प्रकरणाचा अहवाल तयार करुन आपल्याकडे पाठवण्याचेही आदेश दिले आहेत.'