लखनऊ- उत्तर प्रदेशातील लखीमपूरच्या एका लहान मुलीसाठी उद्योगपती गौतम अदानी यांनी मदतीचा हाथ पुढे केला आहे. लखीमपुर खैरीच्या कन्धरापूर गावामध्ये लवली नावाची लहान मुलगी राहते. तिच्या आईचे निधन झाले आहे. लहानपणापासून तिचा डावा पाय आणि हात वाकडे आहेत. त्यामुळे तिला चालण्यास अडचण येते. याची दखल गौतम अदानी यांच्याकडून घेण्यात आली आहे.

गौतम अदानी यांनी सोशल मीडियावर पोस्ट करुन यासंदर्भातील माहिती दिली आहे. ते आपल्या पोस्टमध्ये म्हणालेत की, 'लवलीला चांगले उपचार मिळावेत यासाठी अदानी फाऊंडेशन मदत करेल आणि लवली इतर मुलांसारखं चालू लागेल.' पत्रकार रवीश रंजन यांनी 'एक्स'वर यासंदर्भात एक व्हिडिओ शेअर केला होता. त्यानंतर याची गौतम अदानी यांनी दखल घेतली.

लवली हात आणि पायाने दिव्यांग आहे. पत्रकार रंजन मुलीला विचारतात की, 'तू कोणत्या वर्गामध्ये शिकतेस? लवली सांगते की ती ५वीच्या वर्गात आहे. लवली असंही सांगते की तिला चालण्यास आणि फिरण्यास अडचण येते.' पत्रकार रंजन यांनी दिलेल्या माहितीनुसार, लवली कन्धरापुर गावाची रहिवाशी आहे. आईच्या निधनानंतर तिच्या वडिलांनी दुसरं लग्न केलं. लवलीचे जन्मापासून हात आणि पाय वाकडे आहेत. सध्या ती आपल्या वृद्ध आजी-आजोबांसोबत राहते.

पत्रकार रंजन यांनी लवलीला मदत करण्याचे आवाहन केले होते. त्याला देशातील दुसऱ्या सर्वात श्रीमंत व्यक्तीने प्रतिसाद दिला आहे. अदानी यांनी पोस्टमध्ये म्हटलंय की, 'अशा प्रकारे एखाद्या मुलीचं लहानपण हिरावलं जाणं वाईट आहे. लहान वयामध्ये लवली आणि तिच्या आजी-आजोबांचा संघर्ष आपल्याला सांगतो की, भारतीय कधीही हार मानत नाहीत.'

अदानी फाऊंडेशन लवलीला मदत करणार आहे. इतर मुलांप्रमाणे तिला जगता यावं, शिक्षण घेता यावं यासाठी फाऊंडेशन मदत करणार आहे. आम्ही सर्व लवली सोबत आहोत, असं गौतम अदानी म्हणाले आहेत.