निसर्ग सौंदर्याने नटलेल्या आणि पर्यटनासाठी विशेष प्रसिद्ध असलेल्या अंदमान आणि निकोबारला आज सकाळी भूकंपाचे धक्के जाणवले आहेत. आज सकाळी पावणेसहाच्या सुमारास घडलेल्या या घटनेमुळे पर्यटक चिंतेत आहेत. भूकंपाची तीव्रता ५.० रिश्टर स्केल इतकी होती. (andaman and nicobar earthquake)

सोमवार अंदमान आणि निकोबारवरील वातावरण थंड आणि पावसाचे होते. मात्र आज पहाटे पावणे सहाच्या सुमारास जमीनीला हादरे बसू लागले. हे धक्के इतके जोरदार होते की परिसरातील नागरिक घाबरून घराबाहेर पडले. दरम्यान, नॅशनल सेंटर फॉर सिस्मॉलॉजीनुसार, अंदमान-निकोबार येथे झालेल्या या भुंकपाची तीव्रता अधिक होती. त्यामुळे येथील नागरिकांना सुरक्षा बाळगण्याचे आवाहन करण्यात आले आहे.

भूकंपाचा केंद्रबिंदू हा अंदमान आणि निकोबारची राजधानी पोर्ट ब्लेअरपासून 215 किमी अंतरावर आहे. भूकंपाचे धक्के जोरदार होते परंतु अद्याप कोणत्याही प्रकारची जिवीत किंना वित्त हानी झाल्याची नोंद झालेली नाही. याआधीही 4 जुलै रोजी अंदमान-निकोबारमध्ये भूकंपाचे धक्के जाणवले होते. ते हादरेही तीव्र असल्याचे सांगण्यात आले आहे.

४ जुलै रोजी झालेल्या भुकंपाची ४.४ रिश्टर स्केल इतकी होती. या भूकंपाचा केंद्रबिंदू पोर्ट ब्लेअरपासून २५६ किमी आग्नेयेला होता. त्या भुंकपातही बेटावर कोणत्याही प्रकारची हानी झाली असल्याची नोंद नाही. अंदमान आणि निकोबार बेट भूकंपाच्या दृष्टीने असुरक्षित श्रेणीत येते. त्यामुळे नागरिकांना आणि पर्यटकांना सतर्क राहण्याचे आदेश दिले आहेत.