वाराणसी : भारतीय पुरातत्त्व सर्वेक्षण (एएसआय) विभागाने येथील ज्ञानवापी मशिदीच्या वैज्ञानिक सर्वेक्षणास आजपासून सुरुवात केली. मूळ मंदिराची वास्तू पाडून मशिदीची उभारणी केली आहे का, हे निश्चित करण्यासाठी पुरातत्त्व विभागाने सर्वेक्षणाचे आदेश अलाहाबाद उच्च न्यायालयाने गुरुवारी (ता. ३) दिले होते.

या आदेशानुसार, आज सकाळी सात वाजता पुरातत्त्व विभागाने सर्वेक्षणाच्या कामाला सुरूवात केली. अंजुमन इंतेजामिया मशीद समितीने या कामावर बहिष्कार घातला. दरम्यान, शुक्रवारची नमाज लक्षात घेता सर्वेक्षणाचे काम दुपारी बारा ते दोन या वेळेत दोन तासांसाठी थांबविण्यात आले होते.

यावेळी पुरातत्त्व विभागाच्या पथकाबरोबर हिंदू धर्मीयांचे वकील सुभाष चतुर्वेदी तसेच या प्रकरणातील हिंदू याचिकाकर्तेही यावेळी उपस्थित होते. दरम्यान, ज्ञानवापी मशिदीच्या आवारात कोणताही अनुचित प्रकार न होता कायदा व सुव्यवस्था कायम राहण्यासाठी अतिरिक्त बंदोबस्त ठेवण्यात आला होता.

अंजुमन इंतेजामिया मशीद समितीचे सचिव सईद मोहम्मद यासीन म्हणाले, की आम्ही अलाहाबाद उच्च न्यायालयाच्या या निर्णयाला सर्वोच्च न्यायालयात आव्हान दिले आहे. त्यामुळे, मुस्लिम गटाच्या वकीलांनी या सर्वेक्षणात सहभाग घेतला नाही.

सर्वोच्च न्यायालयाचा निर्णय येईपर्यंत हे सर्वेक्षण पुढे ढकलावे, अशी आमची मागणी होती. यासंदर्भात, आमच्या वकिलांनी संबंधित अधिकाऱ्यांना पत्रही पाठविले होते. मात्र, त्याला उत्तर आले नाही. त्यामुळे, समितीने बैठक घेऊन सर्वेक्षणात सहभागी न होण्याचा निर्णय घेतला, असेही त्यांनी स्पष्ट केले.

...तर खपल्या निघतील

नवी दिल्ली : ‘ज्ञानवापी’मध्ये पुरातत्त्व खात्यामार्फत सर्वेक्षण करण्यास अलाहाबाद उच्च न्यायालयाने दिलेल्या परवानगीला विरोध करणारी याचिका सर्वोच्च न्यायालयाने आज फेटाळून लावली. तसेच, सर्वेक्षण करताना वास्तूचे कोणतेही नुकसान करू नये, असे आदेशही न्यायालयाने पुरातत्त्व खात्याला दिले.

‘ज्ञानवापी-शृंगारगौरी’ प्रकरणी अलाहाबाद उच्च न्यायालयाने काल सर्वेक्षणाला परवानगी दिली होती. मात्र, या सर्वेक्षणामुळे भूतकाळात झालेल्या जखमांवरील खपल्या निघतील, असा दावा करत अंजुमन इंतेजामिया मस्जिद समितीने या आदेशाविरोधात आज सर्वोच्च न्यायालयात दाद मागितली होती. सरन्यायाधीश धनंजय चंद्रचूड यांच्या अध्यक्षतेखालील त्रिसदस्यीय खंडपीठापुढे याबाबत सुनावणी झाली.

अलाहाबाद उच्च न्यायालयाच्या आदेशानंतर पुरातत्त्व विभागाच्या ४३ सदस्यांच्या पथकाने ज्ञानवापीमध्ये सर्वेक्षणाचे काम सुरू केले आहे. पुढील पाच-सहा दिवस हे सर्वेक्षण सुरू राहण्याची शक्यता आहे. या कालावधीत येथे प्रकरणाशी संबंधित फिर्यादी लक्ष्मी सिंह, सीता साहू, रेखा पाठक आणि मंजू व्यास आणि त्यांचे वकीलही उपस्थित असतील.

-मदन मोहन यादव, हिंदू गटाचे वकील