नवी दिल्ली : पंतप्रधान नरेंद्र मोदी या निवडणुकांच्या निकालानंतर भाजपने लागलीच गुजरात विधानसभा निवडणुकीची तयारी सुरु केली आहे. काल निकालाच्या विजयोत्सवानंतर लगेचच दोन दिवसांसाठी पंतप्रधान गुजरात दौऱ्यावर आले आहेत. ते पंचायत सदस्यांच्या सभेला संबोधित करणार असून एक रोड शो देखील काढत आहेत. त्यांच्या या रोड शोला सुरुवात झाली आहे. भाजपच्या उत्तर प्रदेश, उत्तराखंड, मणिपूर आणि गोव्यातील निर्विवाद विजयानंतर पंतप्रधान नरेंद्र मोदींनी अहमदाबाद, गुजरातमध्ये रोड शो सुरू केला आहे. या ठिकाणी त्यांनी विजयी हात करत जनतसमोर शक्ती प्रदर्शन केलं आहे.

भारतीय जनता पक्षाचे प्रदेशाध्यक्ष सी आर पाटील यांनी आधीच म्हटलंय की, पंतप्रधान नरेंद्र मोदी अहमदाबाद एअरपोर्ट ते पक्षाच्या मुख्य कार्यालयापर्यंत रोड शो करतील. यावेळी चार लाख लोक यामध्ये असतील.

राष्ट्रीय रक्षा युनिव्हर्सिटीच्या दीक्षांत समारंभाला देखील ते उपस्थित राहणार आहेत. त्यांच्यासोबत गृहमंत्री अमित शहा देखील उपस्थित असतील. लोकसभेची सेमीफायनल समजल्या जाणाऱ्या या विधानसभा निवडणुकीच्या निकालानंतर ते गुजरातमध्ये जाणार आहे.