केरळ मधील बँकेची कथित फसवणुक (bank fraud) केल्या प्रकरणात ED ने मनी लॉन्ड्रिंग संबंधिच्या तपासादरम्यान एका ज्वेलरी ग्रुपवर छापे टाकण्यात आले असल्याची माहिती अंमलबजावणी संचालनालयाने (ED) ने सोमवारी दिली. या छापेमारीमध्ये तब्बल 26.59 कोटी रुपयांची रोकड, मुदत ठेवी आणि सोन्याचे आणि हिऱ्यांचे दागिने जप्त करण्यात आले आहेत.

अधिक माहिती अशी की, 20 आणि 22 जानेवारी रोजी दिल्ली, मुंबई आणि बेंगळुरू येथील Atlas Jewelry India Ltd (AJIL) चे ऑफिस आणि बँक लॉकर्सची झडती घेण्यात आली. ही कारवाई केरळमधील थ्रिसूर येथील साऊथ इंडियन बँकेच्या राउंड साऊथ शाखेत फसवणूक केल्याप्रकरणी करण्यात आल्याचे सांगण्यात आले आहे. दरम्यान एजेआयएल विरोधात राज्य पोलिसांनी एफआयआर दाखल केल्यानंतर संचालक एमएम रामचंद्रन आणि इंदिरा रामचंद्रन यांच्या विरोधात चौकशी हाती घेण्यात आली.

ईडीने एका निवेदनात म्हटले आहे की, बँकेची फसवणूक करण्याच्या उद्देशाने, त्यांनी योजना आखली आणि बँकेला बनावट कागदपत्रे सादर केली आणि 21 मार्च 2013 ते 26 सप्टेंबर 2018 या कालावधीत 242.40 कोटी रुपयांचे कर्ज घेतले आणि त्याची परतफेड केली नाही. "एमएम रामचंद्रन यांनी अॅटलस ज्वेलरी इंडिया लिमिटेड, नवी दिल्लीच्या इक्विटी शेअर्सच्या खरेदीद्वारे 100 कोटी रुपयांची गुंतवणूक केली होती आणि अॅक्सिस बँक, नवी दिल्ली येथे एस्क्रो (escrow) खात्यात आणखी 14 कोटी रुपये हस्तांतरित केले होते, असे ईडीने सांगितले.

छाप्यांदरम्यान, मुदत ठेवी, भारतीय चलन, सोने, चांदी आणि हिऱ्यांचे दागिने अशा एकूण 26.59 कोटी रुपयांचा मुद्देमाल जप्त करण्यात आला आहे.