North East Express Accident:बिहारमध्ये मोठी रेल्वे दुर्घटना घडली आहे. आनंद विहार टर्मिनलवरून कामाख्याकडे जाणाऱ्या ट्रेन क्रमांक १२५०६ नॉर्थ ईस्ट एक्स्प्रेसचे काही डबे बुधवारी रात्री ९.३५ च्या सुमारास दानापूर विभागातील रघुनाथपूर स्थानकाजवळ रुळावरून घसरले. अनेक लोकांचा मृत्यू झाल्याची माहिती मिळत आहे. मात्र मृतांच्या संख्येबाबत अद्याप अधिकृत माहिती मिळालेली नाही.

दरम्यान, स्थानकात गोंधळाची परिस्थिती आहे. बचावकार्य करण्यासाठी अनेक गावकरी घटनास्थळी दाखल झाले आहेत. आतापर्यंत मिळालेल्या प्राथमिक माहितीनुसार डाउन नॉर्थ ईस्ट एक्स्प्रेसचे 6 डबे रुळावरून घसरले आहेत. पीडीडीयू-पाटणा रेल्वे विभागाच्या रघुनाथपूर स्थानकाजवळ हा अपघात झाला. कोच क्रमांक B7 आणि B8 चे मोठे नुकसान झाले.