नवी दिल्ली : दिल्लीवर घोंघावणाऱ्या वीज संकटावरुन उपमुख्यमंत्री मनीष सिसोदिया यांनी रविवारी पत्रकार परिषद घेत केंद्र सरकारवर सडकून टीका केली. समस्यांवर केंद्रातील भाजप सरकारला तोडगा काढता येत नाही, त्यामुळे ते यावर वेगळीच कारण शोधत आहेत. यावरुन हेच दिसून येतं की, भाजपला सरकार चालवता येत नाहीए, असा आरोपही त्यांनी यावेळी केला.

सिसोदिया म्हणाले, "पॉवर प्लान्टमधून आम्हाला आत्ताही सूचना मिळत आहेत की, नक्की कुठे कुठे कोळशाची कमतरता भासत आहे. कुठले प्रकल्प बंद झाले आहेत, असं असतानाही केंद्रीय ऊर्जा मंत्री आर. के. सिंह यांनी आज पत्रकार परिषदेत कोळशाच्या तुटवड्याची शक्यता फेटाळून लावली. तसेच ही अफवा असल्याचे सांगत मुख्यमंत्री अरविंद केजरीवालांनी आम्हाला पत्र लिहिण्याची गरज नव्हती असंही त्यांनी म्हटलं"

भाजपला सरकार चालवता येत नाहीए

सिसोदिया पुढे म्हणाले, "मला त्यांची पत्रकार परिषद पाहून खूपच दुःख झालं कारण केंद्र सरकारने इतकं बेजबाबदार वक्तव्य केलं आहे. ज्यावेळी देशाचे अनेक मुख्यमंत्री केंद्र सरकारला येणाऱ्या संकटापासून जागृत करत आहेत आणि देशाला या संकटातून बाहेर काढा असं म्हणत आहेत. पण यावर मंत्री म्हणतात कोणतही संकट नाही. उलट जो संकटाची माहिती देतोय तर त्याच्यावर टीका करुन तो चुकीचं सांगतोय असंही ते म्हणत आहेत. यावरुन हे स्पष्ट होतं की, भाजप आज अशा स्थितीत आहे की, त्यांना केंद्रातील सरकार चालवता येत नाहीए. ते केवळ समस्येपासून पळण्याची कारणं शोधत आहेत.

ऑक्सिजनच्या तुटवड्यावेळी देखील सरकार होतं डोळे झाकून

भाजपला देश चालवता येत नाहीए. काही दिवसांपूर्वीच जेव्हा देशात ऑक्सिजनचा प्रचंड तुटवडा निर्माण झाला होता. तेव्हा राज्यांनी, डॉक्टरांनी सर्वांनी ओरडायला सुरुवात केली की, ऑक्सिजनचा तुटवडा आहे, काही तरी करा? तेव्हा केंद्रानं निर्लज्जपणे म्हणतं होतं की, असं काहीही नाहीए. आपण सर्वांनी पाहिलं की ऑक्सिजनच्या तुटवड्यामुळं किती हाहाकार माजला होता. हजारो लोकांना जीव गमवावा लागला. कारण संकटकाळात केंद्र सरकार डोळे बंद करुन बसलं होतं, असंही सिसोदिया यावेळी म्हणाले.