कोलकाता : पश्चिम बंगालची राजधानी कोलकाता येथे सुमारे 40 वर्षे जुना माजेरहाट पूल कोसळल्याची घटना आज (मंगळवार) घडली. हा पूल बेहाला-इकबालनगरला जोडला जात होता. या पुलाचा एक भाग कोसळला असून, या पुलाखाली अनेकजण दबल्याची भीती व्यक्त केली जात आहे.

या पुलाखाली अनेक चारचाकी आणि दुचाकी गाड्या उभ्या होत्या. यामधील अनेक गाड्या ढिगाऱ्याखालील दबल्या गेल्या आहेत. तसेच यामध्ये अनेकजण अडकल्याची भीती आहे. या दुर्घटनेतील बाधितांचा वाचविण्यासाठी बचावकार्य युद्धपातळीवर सुरु करण्यात आले आहे. यातील सहा जणांना बाहेर काढण्यात यश मिळाले असून, या सर्वांना रुग्णालयात दाखल करण्यात आले आहे. याबाबत पश्चिम बंगालचे मंत्री फिरहाद हकीम यांनी सांगितले, की बचावकार्य संपले असून, कोणतीही जीवितहानी झाली नाही. 

दरम्यान, मुख्यमंत्री ममता बॅनर्जी यांनी सांगितले, की पोलिसांकडून या दुर्घटनेची चौकशी करण्यात येईल. मात्र, सध्या आमचे लक्ष फक्त बचावकार्यावर आहे. या दुर्घटनेची माहिती मिळाल्यानंतर आम्ही चिंतेत असून, बचाव पथकाकडून आम्ही प्रत्येक बाबींची माहिती घेत आहोत''.