यूपी निवडणुकीचा निकाल काल लागला आहे. 403 जागांसाठी झालेल्या या निवडणुकीमध्ये भाजपला पुन्हा एकदा बहुमत प्राप्त झालं आहे. मात्र, समाजवादी पार्टीने भाजपला टक्कर देत त्यांच्या जागा कमी केल्या आहेत. मात्र, एकेकाळी यूपीची सत्ता काबीज करणाऱ्या मायवतींचा हत्ती मात्र, सुरुवातीपासूनच्या प्रचारातही रोडावलेला दिसला. त्याचे परिणाम मतमोजणीतील आकड्यांमध्ये स्पष्ट दिसून आले. मायावतींच्या बहुजन समाज पक्षाला अवघी एक जागा मिळाल्या आहेत. या साऱ्या परिस्थितीवर भाष्य करण्यासाठी कालही मायावती माध्यमांसमोर आल्या नव्हत्या. (BSP chief Mayawati)

मात्र, त्यांनी आज त्यावर प्रतिक्रिया व्यक्त केली आहे. त्यांनी म्हटलंय की, यूपी निवडणुकीचे निकाल बसपाच्या अपेक्षेच्या विरोधात जाणारे आहेत. मात्र, त्यामुळे आम्ही निराश होणार नाही. त्याऐवजी, आम्ही त्यातून धडा घेतला पाहिजे, आत्मपरीक्षण केले पाहिजे. तसेच आपल्या पक्षाची चळवळ पुढे नेत पुन्हा सत्तेत आलं पाहिजे.

पुढे त्यांनी म्हटलंय की, 2017 पूर्वी उत्तर प्रदेशात भाजपच्या फारशा जागा नव्हत्या. त्याचप्रमाणे आज काँग्रेसही भाजपच्याच टप्प्यातून जात आहे. उत्तर प्रदेश निवडणुकीचा निकाल हा आपल्यासाठी प्रयत्न सुरू ठेवण्याचा धडा आहे.