निपाणी : देशाच्या सीमेवरील जम्मू काश्मीरमधील अनंतनाग येथे  दहशतवाद्यांशी लढताना बुदिहाळ येथील जवान  भोजराज उर्फ प्रकाश पुंडलिक जाधव (वय २८) यांना वीरमरण प्राप्त झाले आहे. सोमवारी रात्री अतिरेक्यांशी दोन हात करताना ही घटना घडली आहे. भोजराज यांना वीरमरण प्राप्त झाल्याची माहिती मिळताच बुदीहाळसह परिसरावर शोककळा पसरली आहे.

याबाबत अधिक माहिती अशी, की बुदिहाळ येथील भोजराज जाधव हे वर्षांपूर्वी भारतीय सैन्य दलात दाखल झाले होते. त्यांनी आतापर्यंत विविध ठिकाणी सेवा बजावली होती. काही महिन्यांपूर्वीच जम्मू काश्मीरमधील अनंतनाग येथील सीमेवर त्यांची बदली झाली होती.  दरम्यान बदलीनंतर दिवाळीपूर्वी एक महिन्याची सुट्टी घेऊन ते बुदिहाळ या आपल्या मूळ गावी आले होते. दिवाळीनंतर ते पुन्हा अनंतनाग येथे रुजू झाले होते. अनंतराय येथे आपली सर्व खुशाली त्यांनी दोन दिवसांपूर्वी कुटुंबातील सदस्यांना कळविली होती.

मंगळवारी रात्री अनंतनाग भागात अतिरेक्यांनी बेछूट गोळीबर केला. त्यांना प्रत्युत्तर देण्यासाठी जाधव यांच्यासह सहकार्यांनी प्रयत्न केला. यावेळी  एक अतिरेकीही ठार झाला. पण दुर्दैवाने भोजराज हे जवान शहीद झाले. याबाबची माहिती त्याच्या कुटुंबियांना बुधवारी ( ता. २७ ) सकाळी देण्यात आली. या घटनेची माहिती मिळताच कुटुंबियांवर दुःखाचा डोंगर कोसळला आहे शिवाय गावातून शाेक वयक्त केला जात आहे. त्य़ाचप्रमाणे गावातील सर्वच व्यवहार बंद ठेवण्यात आले. दीड वर्षांपूर्वी शहीद जवान भोजराज यांचा विवाह झाला होता. त्यांना दोन महिन्यांची मुलगीही आहे. जवान भोजराज यांच्या मागे आई- वडील भाऊ, पत्नी, मुलगी असा परिवार आहे.