नवी दिल्ली : कोरोनाच्या वाढत्या रूग्णसंख्येत आरोग्य मंत्रालयाने कोविड-19 साठी आणखी दोन लसी आणि एका अँटी-व्हायरल औषधाच्या वापराला आपतकालीन मंजुरी दिली आहे. कोरोना लस कॉर्बेवॅक्स आणि कोव्होव्हॅक्स या दोन लसींसह अँटी-व्हायरल औषध मोलनुपिरावीर आपत्कालीन परिस्थितीत वापरले जाऊ शकतात, अशी माहिती आरोग्य मंत्री मनसुख मांडविया यांनी मंगळवारी ट्वीटद्वारे दिली आहे.

आरोग्यमंत्र्यांनी ट्वीटमध्ये लिहिले आहे की, 'CORBEVAX लस ही भारतातील पहिली स्वदेशी 'RBD प्रोटीन सब-युनिट' ही लस भारतात विकसित करण्या आलेली ही तिसरी लस असून हैदराबादस्थित बायोलॉजिकल-ईने याची निर्मिती केली आहे. याशिवाय सीरम इन्स्टिट्यूट ऑफ इंडियाद्वारे नॅनोपार्टिकल लस, COVOVAX ची निर्मिती करणार असून, अँटीव्हायरल औषध मोलनुपिरावीरची निर्मिती आता देशातील 13 कंपन्या करणार आहेत.

दरम्यान, नव्याने देण्यात आलेल्या लसींमुळे साथीच्या विरुद्धच्या जागतिक लढ्याला आणखी बळ मिळण्यास मदत होणार असल्याचे मांडविया यांनी स्पष्ट केले आहे. भारतात आतापर्यंत, कोविशील्ड, कोव्हॅसिन, ZyCoV-D, स्पुटनिक V, मॉडर्ना, जॉन्सन अँड जॉन्सन, Corbevax आणि Covovax यांच्या आपत्कालीन वापरासाठी मान्यता देण्यात आली आहे.