कोलकता : लोकसभा निवडणुकीसाठी सुरक्षा कर्तव्यावर असलेल्या आसाम रायफल्सच्या एका जवानाने केलेल्या बेछूट गोळीबारात त्याचा एक सहकारी ठार झाला, तर काही जवान जखमी झाले. केंद्रीय राखीव पोलिस दलाच्या (सीआरपीएफ) बागनान या तळावर ही घटना घडली. रजा नाकारल्याने आलेल्या तणावातून या जवानाने हे कृत्य केल्याचे कळते. 

निवडणूक सुरक्षेच्या कर्तव्यावर असलेल्या जवानांचा तळ ज्योतिर्मय गर्ल्स हायस्कूल या शाळेत आहे. तेथे लक्ष्मीकांत बर्मन या जवानाने केलेल्या बेछूट गोळीबारात त्याचा सहकारी भोलानाथ दास हा ठार झाला. बर्मनने तब्बल 18 गोळ्या झाडल्या. या गोळीबारात काही जवान जखमी झाले आहेत. त्यातील दोघांची नावे अनिल राजवंशी आणि रांतू मणी अशी आहेत.

बर्मन याला रजा नाकारण्यात आल्यामुळे तो तणावात होता. त्यात तो आक्रमक होऊन सहकाऱ्यांना धमक्‍या देऊ लागल्यामुळे त्याला एका खोलीत कोंडून ठेवण्यात आले होते. मात्र, तेथून निसटून त्याने सहकाऱ्यांवर बेछूट गोळीबार केला. नंतर अन्य जवानांनी त्याला पकडले. या घटनेचा अहवाल देण्याचा आदेश निवडणूक आयोगाने हावड्याच्या जिल्हा दंडाधिकाऱ्यांना दिला आहे.