नवी दिल्ली : दिल्लीत आम आदमी पक्षाबरोबर (आप) आघाडीच्या सर्व शक्‍यता मावळल्यानंतर कॉंग्रेसने लोकसभा निवडणुकीसाठी आज आपल्या उमेदवारांची घोषणा केली असून, माजी मुख्यमंत्री शीला दीक्षित आणि माजी केंद्रीय मंत्री अजय माकन यांना मैदानात उतरविले आहे. यामुळे दिल्लीत "भाजप विरुद्ध कॉंग्रेस विरुद्ध आप' अशी तिरंगी लढत सातही मतदारसंघांमध्ये असेल. हरियानामध्ये माजी मुख्यमंत्री भूपिंदरसिंह हुडा यांनाही लोकसभेची उमेदवारी मिळाली आहे.

कॉंग्रेसने आज दिल्लीतील सात जागांपैकी सहा जागांवरील उमेदवारांच्या नावांची घोषणा केली. यामुळे "आप'शी आघाडीच्या शक्‍यतांना आता पूर्णविराम मिळाला आहे. कॉंग्रेसने शीला दीक्षित यांना ईशान्य दिल्लीतून उमेदवारी दिली आहे, तर अजय माकन यांना नवी दिल्ली मतदारसंघातून उमेदवार बनविले आहे. पूर्व दिल्लीमधून अरविंदसिंग लवली, वायव्य दिल्लीतून राजेश लिलोथिया आणि पश्‍चिम दिल्लीतून महाबळ मिश्रा उमेदवार आहेत. चांदनी चौक मतदारसंघातून माजी प्रदेशाध्यक्ष जयप्रकाश अग्रवाल यांना निवडणूक रिंगणात उतरविले आहे. या मतदारसंघातून लढण्यास माजी कायदामंत्री व राज्यसभा खासदार कपिल सिब्बल इच्छुक होते. दक्षिण दिल्ली मतदारसंघातील नावाची अद्याप घोषणा झालेली नाही. परंतु, ऑलिम्पिक पदकविजेता कुस्तीपटू सुशीलकुमार याला येथून उमेदवारी मिळण्याची जोरदार शक्‍यता आहे. 

हरियानात पिता-पुत्राला उमेदवारी 
हरियानात कॉंग्रेसने शिल्लक चार उमेदवारांची घोषणा काल केली. फरिदाबादमधील उमेदवार बदलण्यात आला आहे. कॉंग्रेसने माजी मुख्यमंत्री भूपिंदरसिंह हुडा यांना सोनिपतमधून निवडणूक रिंगणात उतरविले आहे. त्यांचे पुत्र व विद्यमान खासदार दीपेंद्र हुडा यांना आधीच रोहतकमधून उमेदवारी मिळाली असल्याने पित्रा-पुत्र एकाचवेळी मतदारांना सामोरे जातील. याव्यतिरिक्त कुरुक्षेत्रमधून निर्मल सिंह, कर्नालमधून कुलदीप शर्मा यांना, तर हिस्सारमधून भव्य बिश्‍नोई यांना उमेदवारी मिळाली आहे.