दिल्ली : कोरोनामुळे देशातील सर्वच घटकांवर परिणाम झाल्याचं आपल्याला पहायला मिळालं आहे. गेल्या दोन वर्षापासून शाळा बंद असल्याने लहान मुलांवर परिणाम झाला आहे. त्याचबरोबर त्यांच्या वैचारिक आणि बुद्धीमत्तेवर परिणाम झाल्याचे आपल्याला पहायला मिळत आहे. या काळात झालेल्या बदजलांवर अभ्यास करण्यासाठी सरकार 'कोरोनामुळे लहान मुलांवर मानसिक आणि भावनिकरित्या झालेला परिणाम' या विषायावर सर्वेक्षण करणार आहे. हे सर्वेक्षण मुलांचे पुढील शैक्षणिक वर्ष सुरु होण्याच्या आधी होणार असल्याचं सरकारकडून सांगण्यात आलंय. (Effect On Student Mentality In Corona And Lockdown)

मागच्या दोन वर्षापासून कोरोनामुळे शाळा बंद असल्याने मुलं घरी बसून आहेत. या काळात लहान मुलांवर झालेले मानसिक आणि भावनिक बदल जाणून घेण्यासाठी मोठ्या पातळीवरील सर्वेक्षण करण्यात येणार आहे असे सरकारने शुक्रवारी स्पष्ट केले. या सर्वेक्षणाचा फायदा मुलांच्या शाळेतील वागणुकीत बदल करण्यासाठी होणार असल्याचं सरकारने स्पष्ट केलंय. शैक्षणिक खात्याच्या अधिकाऱ्यांनी सांगितले की, ह्या सर्वेक्षणाचे काम पहिल्या टप्प्यात असून त्यावर काम सुरु आहे. तसेच सरकारने सोपवलेल्या सर्वेक्षणाचा आराखडा तयार करत असल्याचं त्यांनी स्पष्ट केले.

हे सर्वेक्षण पूर्ण करण्यासाठी केंद्राचा शिक्षण विभाग आम्हाला मदत करेल. तसेच हा निर्णय काही दिवसांपूर्वीच घेतला असल्याने हे काम पूर्ण करण्यासाठी कालावधी ठरलेला नाही. पण हे काम मुलांचे शैक्षणिक वर्ष सुरु होण्याआधी पूर्ण करायचे असल्याच्या सूचना सरकारने दिल्या आहेत असे अधिकाऱ्यांनी सांगितले.

कोरोना काळातील झालेल्या परिणामावर अभ्यास करण्यासाठी आणि या आव्हानात्मक परिस्थितीशी जुळवून घेण्यासाठी हे सर्वेक्षणातील मुद्दे कामी येतील. तसेच शैक्षणिक काळात विद्यार्थांच्या मानसिकतेत विकास होण्यासाठी, तणावमुक्त आणि स्वातंत्र्य वैचारिक बुद्धीमत्तेचा विकास होण्यासाठी, शाळेत शिक्षक आणि विद्यार्थांमधील सुसंवाद घडवून आणण्यासाठी हे सर्वेक्षण महत्त्वाचे ठरेल असे अधिकाऱ्यांनी सांगितलंय.