नवी दिल्ली : युको बॅंकेने आपल्या काही खातेधारकांच्या खात्यात ८२० कोटी रुपये वर्ग केल्याची चूक केली होती. या पार्श्वभूमीवर सायबर सुरक्षा मजबूत करण्याचे निर्देश अर्थमंत्रालयाने सार्वजनिक क्षेत्रातील बॅंकांना दिले आहेत.

‘‘डिजिटल व्यवहारांच्या संदर्भातील यंत्रणा आणि प्रक्रियेचा आढावा घेऊन सायबर सुरक्षा मजबूत करावी. भविष्यात सायबर हल्ले आणि चुका होऊ नयेत, यासाठी आतापासूनच आवश्यक ती काळजी घ्यावी,’’ असे अर्थ मंत्रालयाने सार्वजनिक बॅंकांना सांगितले आहे. बॅंकांचे डिजिटायझेशन वाढत असले तरी त्यात काही धोकेही आहेत. अर्थ मंत्रालय आणि आरबीआयकडून सार्वजनिक बँकांना या धोक्यांची जाणीव करून दिली जात आहे.

काही दिवसांपूर्वी युको बॅंकेने आपल्या खातेधारकांच्या खात्यात ‘आयएमपीएस’द्वारे ८२० कोटी रुपये वर्ग केले होते. तांत्रिक चुकीमुळे ही घटना घडल्याचे त्यावेळी सांगण्यात आले होते. ८२० कोटींपैकी ६४९ कोटी रुपये परत मिळविण्यात युको बँकेला यश आले असून उर्वरित रक्कम परत मिळविण्यासाठी प्रयत्न सुरु आहेत. याबाबत आवश्यक ती कार्यवाही करण्यासाठी बॅंकेकडून तपास संस्थांना विचारणा करण्यात आली आहे.