वर्षभरापासून दिल्लीच्या सिमांवर सुरू असणाऱ्या शेतकरी आंदोलनाची(Farmers Protest) सांगता दोन दिवसांपूर्वी झाली. मागील महिन्यात पंतप्रधान नरेंद्र मोदी(PM Modi) यांनी तीन कृषी कायदे रद्द करणार असल्याची घोषणा केली. यानंतर संसदेच्या हिवाळी अधिवेशनातही (Winter session 2021)पहिल्याच दिवशी कायदे मागे घेण्याची कायदेशीर प्रकिया पार पडली.

यानंतर एमएसपीच्या (MSP) मुद्द्यावर शेतकऱ्यांनी आंदोलन सुरू ठेवणार असल्याचं सांगितलं. मात्र, त्या मुद्द्यावर पंतप्रधानांनी पत्र लिहून आश्वासन दिल्यानंतर शेतकऱ्यांनी आंदोलन संपवण्याचा मार्ग धरला. जवळपास वर्षभरापासून दिल्लीच्या सीमेवर असणाऱ्या आंदोलनकर्त्यांनी आज सामान गुंडाळत आपल्या गावी माघारी जाण्यासाठी तयारी सुरू केली. त्यामुळे पंजाब, हरयाणा या प्रांतातून आलेल्या शेतकऱ्यांची सकाळपासूनच गावी जाण्याची लगबग सुरू आहे.

येत्या १५ डिसेंबरला संयुक्त किसान मोर्चा (Sanyukt Kisan Morcha) अधिकृतपणे त्यांची भूमिका जाहीर करणार आहे. मात्र, त्याआधी शेतकऱ्यांनी परतीचे मार्ग धरले आहेत. त्यामुळे दिल्लीच्या सिमेवरील आंदोलन वर्षभरानंतर संपल्याचे चित्र आहे.

शेतकऱ्यांचा मोठा गट उद्या सकाळी ८ वाजता जागा रिकामी करेल. आजच्या मीटिंगमध्ये, आम्ही बोलू, प्रार्थना करू आणि ज्यांनी आम्हाला मदत केली त्यांच्या भेटीगाठी घेऊ, असं शेतकरी नेते राकेश टिकैत यांनी सांगितलं. लोकांनी आधीच जागा सोडण्यास सुरुवात केली आहे. या प्रक्रियेला 4-5 दिवस लागतील. मी १५ डिसेंबरला निघणार असल्याची माहिती संयुक्त किसान मोर्चाच्या प्रमुखांनी दिली. टिकैत यांनी गाझीपूर बॉर्डरवर पत्रकारांशी संवाद साधला.