काश्मीरमध्ये गेल्या काही दिवसांत दहशवाद्यांच्या हालचाली वाढल्या असून, त्यामुळे पुन्हा एकदा अशांतता निर्माण झाली आहे. दहशतवाद्यांकडून झालेल्या हल्ल्यात हिंदू आणि शीख नागरिकांना लक्ष्य करण्यात आल्याचं समोर आलं असून, या हल्ल्यानंतर सुरक्षा यंत्रणांनी मोठी मोहिम हाती घेतल्याचं पाहायला मिळतंय. त्यातच आता काश्मीरचे ज्येष्ठ नेते फारूक अब्दूल्ला यांनी काश्मीरमधल्या परिस्थितीबद्दल आपल्या भावना व्यक्त केल्या आहेत. यावेळी त्यांनी नागरिकांच्या हत्या होणं दुर्देवी असल्याचं म्हटलं आहे.

जम्मू काश्मीरमध्ये मागच्या काही दिवसांत दहशतवाद्यांकडून झालेल्या हल्ल्यात बिगर मुस्लीमांना लक्ष्य केल्याचं आढळून आलं आहे. या घनटेनंतर नॅशनल कॉन्फरन्सचे नेते फारूक अब्दूल्ला यांनी घटनांवर आज आपल्या भावना व्यक्त केल्या. निरपराध लोकांना मारणं हे दुर्दैवी आहे, हे सर्व काश्मीरींना बदनाम करण्यासाठी केलं जातंय, असं म्हणत फारूक अब्दूल्ला यांनी या घटनांचा निशेध केलाय.