नवी दिल्ली : हिंदू महाविद्यालयाचे प्राध्यापकांनी शिवलिंगाबाबत सोशल मीडियावर आक्षेपार्ह पोस्ट (Offensive Post on Shivling) केली होती. त्यानंतर नेटकऱ्यांनी त्यांना धारेवर धरले असून त्यांच्यावर गुन्हा दाखल करण्यात आला. धार्मिक भावना दुखावल्याप्रकरणी हा गुन्हा दाखल करण्यात आल्याचे पोलिसांनी सांगितले.

रतन लाल असे या प्राध्यपकाचे नाव असून ते दिल्लीतील हिंदी महाविद्यालयात कार्यरत आहेत. त्यांनी ज्ञानवापी मशिदीत शिवलिंग सापडल्याच्या दाव्याचा संदर्भ देत सोशल मीडियावर आक्षेपार्ह पोस्ट केली आहे. त्यानंतर त्यांच्यावर गुन्हा दाखल करण्यात आला आहे. प्राध्यापक रतन लाल यांनी मंगळवारी एक फोटो शेअर केला असून त्यावर आक्षेपार्ह भाषेत टिप्पणी केली आहे. त्यामुळे धार्मिक भावना दुखावल्याप्रकरणी गुन्हा दाखल करण्यात आला आहे.

शिवलिंगावरील आक्षेपार्ह पोस्ट व्हायरल झाल्यानंतर प्राध्यापकांना धमक्या दिल्या जात आहेत. त्यानंतर त्यांनी पोलिसांना संरक्षण मागितले आहे. माझी पोस्ट योग्य असून मला पोलिसांकडून कोणतीही नोटीस मिळाली नाही. मला नोटीस मिळाली तर मी त्यांना सहकार्य करेन. मी टीका केलेली नाही. मी माझं निरीक्षण नोंदवलं आहे. आपल्या देशात कोणत्याही गोष्टीबद्दल बोललं की धार्मिक भावना दुखावल्या जातात, असं त्यांनी एका माध्यमासोबत बोलताना म्हटलं आहे.

दरम्यान, एआयएमआयएमचे प्रवक्ते दानिश कुरेशी यांनी सोशल मीडियावर शिवलिंगाबाबत आक्षेपार्ह पोस्ट लिहिली होती. यानंतर विश्व हिंदू परिषदेनं त्यांच्याविरोधात पोलिसात तक्रार दाखल केली. त्यानुसार अहमदाबादच्या सायबर क्राइम ब्रँचनं दानिश कुरेशी यांना अटक केली आहे.