चेन्नई- तामिळनाडूमधील कृष्णगिरी जिल्ह्यातील उड्डानपल्लीतील टाटा इलेक्टॉनिक्समधील प्लँटला (Tata Electronics Private Limited (TEPL)) भीषण आग लागली आहे. शनिवारी सकाळी ही आग लागली. आगीची माहिती मिळताच अग्निशमन दलाच्या गाड्या घटनास्थळी दाखल झाल्या होत्या. सर्व कर्मचाऱ्यांना बाहेर काढण्यात आलं आहे. अद्याप यात जीवितहानीचे कोणतेही वृत्त नाही. 'टाइम्स ऑफ इंडिया'ने यासंदर्भातील वृत्त दिलं आहे.

मिळालेल्या माहितीनुसार, प्लँटमध्ये मोबाईल फोन उपकरणांचे काम सुरु होते. आगीची चाहुल लागताच योग्य पाऊल उचलत सर्व कर्मचाऱ्यांना सुरक्षित बाहेर काढण्यात आले. आग विझवण्यासाठी अग्निशमन दलाच्या सात गाड्या आल्या आहेत. आग विझवण्याचे काम सुरु आहे. माहितीनुसार, TEPL कंपनी iPhones चे विविध पार्ट बनवण्याच्या कामात गुंतलेली आहे.

आकाशात दिसून आले धुराचे लोट

कंपनीमध्ये जवळपास ४,५०० कर्मचारी विविध शिफ्टमध्ये काम करतात. विशेष म्हणजे कंपनीमध्ये जवळपास ८० टक्के महिला कर्मचारी आहेत. पेंटिंग युनिटमध्ये ही आग लागली असं सांगितलं जातं. सकाळी साडेपाचच्या सुमारास ही आग लागली. तीन कर्मचाऱ्यांना श्वास घेण्यास अडथळा जाणवत होतो, त्यांना खासगी हॉस्पिटलमध्ये उपचारासाठी दाखल करण्यात आले आहेत. त्यांची प्रकृती स्थिर आहे.