MP Crime News : विदिशातील बंटी नगर भागात राहणारे भाजपचे (BJP) माजी नगरसेवक संजीव मिश्रा (Sanjeev Mishra) यांनी गुरुवारी सायंकाळी पत्नी आणि दोन मुलांसह विषारी द्रव्य प्राशन करून आत्महत्या केली.

मुलांच्या आजारानं संजीव त्रस्त झाले होते. पोलिसांना खोलीतून एक सुसाईड नोटही सापडली असून, त्यात त्यांनी आजारपणाचा उल्लेख करत आत्महत्या केल्याचं लिहिलंय.

संजीव यांचा पुतण्या अभिषेकनं सांगितलं की, गुरुवारी संध्याकाळी काका संजीव आणि त्यांचे कुटुंबीय बराच वेळ खोलीतून बाहेर न आल्यामुळं आम्ही त्याच्या मित्रांना आणि पोलिसांना (Police) बोलावलं. पोलिस येताच खोलीचा दरवाजा तोडला असता संजीव, त्याची पत्नी नीलम, मुलं अनमोल (13 वर्षे) आणि सार्थक (6 वर्षे) हे खोलीत जमिनीवर पडलेले आढळले.

अनमोल आणि सार्थक यांचा मृत्यू झाला तर संजीव आणि त्यांची पत्नी श्वास घेत होते. दोघांनाही तातडीनं जिल्हा रुग्णालयात दाखल करण्यात आलं. मात्र, तिथं उपचारादरम्यान संजीव यांचा मृत्यू झाला.

पत्नी नीलमला मेडिकल कॉलेजमध्ये पाठवण्यात आलं, तिथं तिचाही काही वेळानं मृत्यू झाला. सीएसपी विकास पांडे यांनी सांगितलं की, खोलीतून विषाचा बॉक्स आणि एक सुसाईड नोट जप्त करण्यात आली आहे. सुसाईड नोटमध्ये मुलांच्या आजारामुळं आत्महत्या केल्याचं लिहिलं आहे. संजीव यांचा मोठा मुलगा अनमोल गेल्या आठ वर्षांपासून मस्कुलर डिस्ट्रॉफी या आजारानं त्रस्त होता, त्यामुळं त्यांनी हे टोकाचं पाऊल उचललं आहे.