नवी दिल्ली: देशात इंधन दरवाढीचा भडका कायम असून, मंगळवारी पेट्रोल आणि डिझेलच्या दरात प्रतिलिटर 34 पैशांपर्यंत वाढ करण्यात आली. केंद्र सरकारने मागील आठवड्यात पेट्रोल, डिझेलवरील उत्पादन शुल्कात प्रतिलिटर अडीच रुपये कपात केली होती. यानंतर काही राज्यांनीही मूल्यवर्धित करात कपात केली होती. 

मात्र, सरकारी तेल कंपन्यांकडून सुरू असलेल्या दरवाढीने नागरिकांना काही प्रमाणात मिळालेल्या दिलाशावर पाणी फिरले आहे. पेट्रोलचा दर आज मुंबईत प्रतिलिटर 87.73 रुपये, दिल्लीत 82.26 रुपये, चेन्नई 85.50 रुपये आणि कोलकत्यात 84.09 रुपयांवर गेला. देशातील चार महानगरांमध्ये दिल्लीत पेट्रोल सर्वांत स्वस्त असून, मुंबईत ते सर्वात महाग आहे. डिझेलचा दर आज मुंबईत प्रतिलिटर 77.68 रुपये, दिल्लीत 74.11 रुपये, चेन्नईत 78.35 रुपये आणि कोलकत्यात 75.96 रुपयांवर पोचला. 

जागतिक पातळीवर खनिज तेलाच्या भावात वाढ सुरू असून, आज तो प्रतिबॅरल 84 डॉलरवर पोचला. यातच डॉलरच्या तुलतेन रुपयातील घसरणीमुळे खनिज तेलाची आयात महाग आहे. यामुळे तेल कंपन्यांकडून पेट्रोल आणि डिझेलच्या किरकोळ विक्री दरात वाढ सुरू आहे. 

मुंबईतील दर (प्रतिलिटर रुपये) 
पेट्रोल : 87.73 
डिझेल : 77.68