पणजी : आम आदमी पार्टीनं (AAP) पंजाबनंतर आता गोव्यातही आपला मुख्यमंत्रीपदाचा उमेदवार (Chief Ministerial Candidate) जाहीर केला आहे. त्यानुसार अमित पालेकर (Amit Palekar) हे आता गोव्यात आपचा मुख्यमंत्रीपदाचा चेहरा असतील. आपचे राष्ट्रीय संघटक अरविंद केजरीवाल यांनी याची बुधवारी घोषणा केली. गोव्यात ४० जागांवर आप निवडणूक लढवत आहे. (Goa Assembly Election AAP CM Candidate announced Amit Palekar will be CM Face)

कोण आहेत अमित पालेकर?

गोव्यात मुख्यमंत्रीपदाचा उमेदवार जाहीर करताना अरविंद केजरीवाल यांनी सांगितलं की, अमित पालेकर हे व्यवसायाने वकील असून ते भंडारी समाजाचं प्रतिनिधीत्व करतात. या समाजाची गोव्यात ३५ टक्के इतकी लोकसंख्या आहे. अमित पालेकर हे गोव्यातील एक प्रसिद्ध चेहरा असून सामाजिक कार्यात ते खूपच सक्रीय आहेत. अनेकदा त्यांनी भ्रष्टाचाराविरोधात आवाज उठवलेला आहे. पालेकर यांच्यासाठी राजकारण नवं नाही कारण त्यांची आई गोव्यातील सांताक्रूझ भागात दहा वर्षे सरपंच राहिल्या आहेत.

६० वर्षात अडीच वर्षांसाठी झाला होता भंडारी समाजाचा मुख्यमंत्री

केजरीवाल यांनी सांगितलं की, अमोल पालेकर यांनी समाजासाठी खूप काम केलं आहे. गोव्याचं राजकारण पाहता ते खूपच प्रामाणिक उमेदवार आहेत. गोव्यातील एक मोठा भंडारी समाज ३५-४० टक्के इतका आहे. १९६१ मध्ये गोवा स्वतंत्र झाला. तेव्हापासून आजपर्यंत साठ वर्षात या समाजाचा एक व्यक्ती अडीच वर्षांसाठी मुख्यमंत्री बनला होता.