गुजरातमधील नवसारी न्यायालयाच्या अखत्यारित एक अनोखी घटना घडली आहे. गेल्या सहा वर्षांपासून अटकेत असलेल्या दोन जणांची न्यायालयाने निर्दोष मुक्तता केली आहे. या दोघांवरही हत्येचा आरोप होता. मात्र, ज्याच्या हत्येचा त्या दोघांवर आरोप होता, तो व्यक्तीच जिवंत होता. अतिरिक्त सत्र न्यायाधीश सारंगा व्यास यांनी 30 मार्च रोजी जारी केलेल्या आपल्या आदेशामध्ये तपास अधिकारी आणि नवसारीमधील तत्कालीन नीरीक्षक प्रदीप सिंह गोहिल यांना बेजबाबदारपणे तपास केल्याचा ठपका ठेवत दोघांना 50-50 हजार रुपयांची भरपाई देण्याचा आदेश दिला. कोर्टाने म्हटलंय की तपास अधिकाऱ्यांच्या निष्काळजीपणामुळे या दोघांना मानसिक आणि शारिरीक त्रासातून जावं लागलं तसेच त्यांच्या प्रतिष्ठेलाही धक्का लागला आहे.

पोलिसांनी दिलेल्या माहितीनुसार, या कथित हत्या प्रकरणामध्ये नवसारी ग्रामीण पोलिस ठाण्यामध्ये FIR नोंदवण्यात आली होती. त्या आधारावर आरोपी मदन पिपलादी आणि सुरेश पतेला यांना 6 जुलै 2016 रोजी अटक करण्यात आली होती. या प्रकरणी पोलिसांना मिळालेला मृतदेहाची चुकीची ओळख ठरवली गेली आणि त्याला गयारी हा मृत व्यक्ती मानलं गेलं. या आरोपींना आपल्या सुटकेच्या आधी तीन महिन्यांपर्यंत तुरुंगातच रहावं लागलं होतं. कोर्टाने त्यांना पाच दिवसांपूर्वी सोडून दिलं आहे.

नेमका कसा आणि कुठे झाला घोळ?

वास्तविकत: गयारी हा गेल्या काही दिवसांपासून गायब होता. चुकीच्या मृतदेहाला गयारी ठरवून पोलिसांनी तो त्याच्या नातेवाईंकांकडे सुपुर्द केला. नातेवाईकांनीही त्याला आपल्या गावी नेऊन त्याचे अंतिम संस्कार करुन टाकले. मात्र, काही तासांनंतर गयारीच्या भावाला कळालं की तो जीवंत असून त्याच्या नातेवाईकांकडेच राहतो आहे. त्याने याबाबत पोलिसांना माहितीही दिली. मात्र, तरीही पोलिसांनी त्या दोन जणांवर आरोपपत्र दाखकल केलं की त्या दोघांनीच गयारीची हत्या केली आहे. कारण गयारी एके रात्री चोरुन त्यांच्या घरात घुसला होता. हे कथित मृत आणि कथित आरोपी हे तिघेही एकाच फॅक्टरीमध्ये काम करायचे आणि एके रात्री अन्नाच्या शोधात गयारी त्यांच्या घरात घुसरला होता. त्यानंतर भीतीने तो नवसारीमधून पळून गेला आणि एका नातेवाईकांकडे राहू लागला होता.