Gyanvapi Case: वाराणसी जिल्हा न्यायालयाने हिंदूंच्या बाजूने मोठा निर्णय दिला आहे. ज्ञानवापी मशीद संकुलातील दक्षिणेकडील तळघरात पूजा करण्याचा अधिकार हिंदू पक्षाला देण्यात आला आहे. याला 'व्यासजी का तहखाना', असे देखील म्हणतात.  न्यायालयाने जिल्हा प्रशासनाला १५ दिवसांत बॅरिकेडिंगची व्यवस्था करण्याचे आदेश दिले आहेत.

हे तळघर मशिदीच्या खाली आहे. आता येथे नियमित पूजा होणार आहे. काशी विश्वनाथ विश्वस्त मंडळातर्फे पूजा करण्यात येणार आहे. हिंदू पक्षाने हा मोठा विजय असल्याचे म्हटले असून ३० वर्षांनंतर न्याय मिळाल्याचा दावा केला आहे. नोव्हेंबर १९९३ पर्यंत येथे पूजा केली जात होती.  जिल्हा प्रशासनाला ७ दिवसांच्या आत व्यवस्था करावी, असे आदेश देण्यात आल्याचे हिंदू बाजूचे वकील विष्णू शंकर जैन यांनी सांगितले.

मशिदीचे व्यवस्थापन करणाऱ्या अंजुमन इंतेजामिया मसाजिद कमिटी (AIMC) विरुद्ध शैलेंद्र कुमार पाठक व्यास यांनी दाखल केलेल्या दाव्याला उत्तर म्हणून न्यायालयाचा निर्णय आला. दरम्यान 'व्यासजी का तहखाना' काय आहे. ज्ञानवापी मशिद हे भाग आहे का हे आपण जाणून घेऊया.

व्यासजी का तहखाना म्हणजे काय?

मशिदीच्या तळघरात चार 'तहखाने' (तळखाने) आहेत त्यापैकी एक आजही येथे राहणाऱ्या व्यास कुटुंबाच्या ताब्यात आहे. शैलेंद्र कुमार पाठक व्यास यांनी मशिदीचे व्यवस्थापन करणाऱ्या अंजुमन इंतेजामिया मसाजिद कमिटीच्या विरोधात खटला दाखल करून जिल्हा दंडाधिकारी यांना तळघराचा रिसीव्हर म्हणून नियुक्त करण्याची विनंती केली होती.

याचिकेत काय म्हटलं आहे -

याचिकेनुसार, पुजारी सोमनाथ व्यास १९९३ पर्यंत तेथे प्रार्थना करत होते. त्यानंतर तळघर बंध करण्यात आले.  सोमनाथ व्यास यांचा नातू असल्याने  तहखान्यात प्रवेश करून पूजा सुरू करण्याची परवानगी देण्यात यावी, अशी मागणी शैलेंद्र कुमार पाठक व्यास यांनी केली होती. मशीदीत येणारे लोक तळघरात भेट देत असतात आणि ते तळघर ताब्यात घेऊ शकतात, असा आरोप देखील व्यास यांनी केला होता. मात्र एआयएमसीचे वकील अखलाक अहमद यांनी हा आरोप निराधार असल्याचे फेटाळून लावले.