लखनौ : ‘‘हरियानामध्ये होऊ घातलेल्या विधानसभा निवडणुकीदरम्यानदेखील काँग्रेसकडून सातत्याने दलितांची उपेक्षा आणि त्यांचा तिरस्कार केला जात आहे. याचा अर्थ काँग्रेसमध्ये (Congress) सर्वकाही आलबेल नाही हे यावरून सिद्ध होते. पक्षात आताच जर ही परिस्थिती आहे, तर पुढे काय होईल त्यामुळे दलितांनी काँग्रेस किंवा भाजपसारख्या पक्षांना मतदान करू नये,’’ असे आवाहन बहुजन समाज पक्षाच्या (बसप) प्रमुख मायावती (Mayawati) यांनी रविवारी केले आहे.

त्यांनी एक्स या समाजमाध्यमावरून काँग्रेस आणि भाजप (BJP) दोघांवरही टीका केली आहे. ‘‘काँग्रसचे नेते हे आरक्षण विरोधी आहेतच, मात्र आता तर ते, ‘योग्य वेळ आल्यावर आरक्षण संपवू’ असे म्हणत आहेत. त्यामुळे या निवडणुकीत दलितांना बहुजन समाज पक्षाला एकगठ्ठा मतदान करावे, कारण आमचा पक्ष एकमेव आहे जो कायमच दलितांच्या हिताचा आणि त्यांना त्यांचे घटनात्मक हक्क मिळावेत यासाठी कार्यरत आहे.’’ असे मायावती म्हणाल्या.

जम्मू-काश्‍मीरमध्येही दलितांना आवाहन

मायावती यांनी जम्मू-काश्‍मीरमधील दलितांनादेखील काँग्रेस आणि भाजपऐवजी बहुजन समाज पक्षाच्या उमेदवारांना मतदान करण्याचे आवाहन केले आहे. ‘‘काँग्रेस आणि भाजपच्या खोट्या आश्‍वासनांना अजिबात बळी पडू नका. त्यांचा इतिहास हा दलितविरोधी आहे,’’ असे मायावती यावेळी म्हणाल्या.