नवी दिल्ली : युद्धग्रस्त युक्रेनमधून भारतात परतणाऱ्या विद्यार्थ्यांच्या पुढील अभ्यासाबाबत परिस्थितीनुसार निर्णय घेतला जाईल, असे केंद्रीय आरोग्य मंत्रालयाचे सहसचिव लव अग्रवाल यांनी सांगितले आहे. हा एक कठीण काळ असल्याचे अग्रवाल यांनी सांगितले. युक्रेनमधून येणाऱ्या भारतीय विद्यार्थ्यांचा पुढील अभ्यास कसा होईल आणि सरकार याबाबत काही नियोजन करत आहे का, या प्रश्नाना उत्तर देताना त्यांनी ही माहिती दिली आहे. (Health Ministry on Student Returning From Ukraine )

ते म्हणाले की, आम्ही परराष्ट्र मंत्रालयाच्या संपर्कात काम करत असून, देशात परतल्यावर विद्यार्थ्यांसाठी नियम शिथिल करण्यात आले. भविष्यातही परिस्थितीनुसार त्यांच्याबाबत निर्णय घेतला जाईल. परिस्थिती चिंताजनक आहे हे समजून घेतले पाहिजे. संबंधित विभाग त्यावर लक्ष ठेवून असल्याचे त्यांनी यावेळी स्पष्ट केले. युक्रेनवर रशियन सैन्याच्या युद्धामुळे शेकडो भारतीय अजूनही युक्रेनमध्ये अडकले असून त्यांना बाहेर काढण्यासाठी भारत सरकारकडून विविध उपाययोजना केल्या जात आहेत.

18,000 हजार भारतीय परतले

दरम्यान, रशिया आणि युक्रेनमध्ये युद्द सुरू झाल्यानंतर भारत सरकारकडून जारी करण्यात आलेल्या पहिल्या अॅडव्हायझनंतर एकूण 18,000 भारतीय नागरिक युक्रेनमधून भारतात परतले आहेत. तसेच ऑपरेशन गंगा अंतर्गत, युक्रेनमधून 6,400 भारतीयांना घेऊन आतापर्यंत 30 उड्डाणे भारतात पोहोचली असून, पुढील 24 तासांत आणखी 18 विमाने नियोजित असल्याची माहिती परराष्ट्र मंत्रालयाचे प्रवक्ते अरिंदम बागची यांनी दिली आहे.