गांधीनगर : भारतात सेमीकंडक्टर उत्पादन प्रकल्प उभारणाऱ्या तंत्रज्ञान कंपनीला केंद्र सरकारकडून ५० टक्के अर्थसाह्य पुरविले जाईल, असे आश्‍वासन पंतप्रधान नरेंद्र मोदी यांनी आज दिले. भारतात येणाऱ्या सेमीकंडक्टर कंपन्यांचे स्वागत असल्याचेही मोदी म्हणाले.

गुजरातमधील गांधीनगर येथे आज ‘सेमीकॉन इंडिया २०२३’ या परिषदेचे उद्‌घाटन झाले. यावेळी मोदी यांनी सेमीकंडक्टर कंपन्यांना भारतात दिल्या जाणाऱ्या सुविधांची माहिती सांगितली. मोदी म्हणाले,‘‘सेमीकंडक्टर उद्योग भारतात रुजून त्याचा विस्तार व्हावा, यासाठी आम्ही पूरक यंत्रणा तयार करत आहोत.

सेमीकॉन इंडिया कार्यक्रमाअंतर्गत आम्ही प्रोत्साहनही देत आहोत. या प्रोत्साहनातही आता वाढ केली असून भारतात सेमीकंडक्टरचा उत्पादन प्रकल्प उभारणाऱ्या तंत्रज्ञान कंपनीला ५० टक्के अर्थसाह्य पुरविले जाणार आहे.

आगामी काळात भारतात हा उद्योग चांगलेच मूळ धरेल, असा आम्हाला विश्‍वास आहे.’’ भारतातील सेमीकंडक्टर क्षेत्रात का गुंतवणूक करावी, असे वर्षभरापूर्वी विदेशी कंपन्या विचारत होत्या. आता, आम्ही गुंतवणूक का करू नये, असे विचारले जात आहे. सेमीकंडक्टर क्षेत्रातील गुंतवणुकीसाठी भारत हा एक मोठा ‘वाहक’ बनत आहे, असेही मोदी म्हणाले.

पंतप्रधान मोदी म्हणाले ...

• जगाला चिपचा विश्‍वासार्ह पुरवठा हवा आहे

• सेमीकंडक्टर रचनेचा अभ्यासक्रम सुरु करणार

• मित्रदेशांच्या सहकार्याने सेमीकंडक्टरसाठी पूरक यंत्रणा तयार करणार

• अविरत वीजपुरवठ्यासाठी सौर ऊर्जाक्षमता २० पटींनी वाढविली

• २०३० पर्यंत सौरऊर्जेदवारे ५०० गिगावॉट ऊर्जानिर्मितीचे उद्दिष्ट