नवी दिल्ली : अफगाणिस्तानमध्ये तालिबानने सत्ता स्थापन केल्यानंतर अमेरिका, रशिया आणि चीनसारख्या देशांच्या या विषयावर सातत्याने बैठका सुरु आहेत. या पार्श्वभूमीवरच आता भारतात देखील बैठक होणार आहे. राजधानी दिल्लीमध्ये राष्ट्रीय सुरक्षा सल्लागारांची (NSA) बैठक होणार आहे. या बैठकीसाठी पाकिस्तान आणि रशियाला देखील निमंत्रण देण्यात आलंय. मीडिया रिपोर्ट्सनुसार, पाकिस्तानी सुत्रांनी देखील याबाबत पुष्टी दिलीय. पाकिस्तानचे राष्ट्रीय सुरक्षा सल्लागार मोईद युसूफ यांना मागील आठवड्यात याबाबतचं निमंत्रण मिळालं आहे. या देशांशिवाय चीन, इराण, ताजिकिस्तान आणि उजबेकिस्तान या देशांना देखील निमंत्रण देण्यात आलंय. या बैठकीचं अध्यक्षस्थान भारताचे NSA अजित डोवाल भुषवणार असल्याची माहिती आहे.

या मुद्यांवर होईल चर्चा

या बैठकीमध्ये अफगाणिस्तानातील मानवी संकट आणि मानवाधिकारांच्या मुद्यावर चर्चा होईल. याशिवाय सुरक्षा मुद्यांवर देखील चर्चा केली जाईल. तालिबानकडून जगाला ज्या अपेक्षा आहेत, त्याबाबत आणि तालिबानी सरकारच्या शासन प्रणालीवर देखील चर्चा होईल. तसेच महिलांच्या सुरक्षेबाबत आणि शिक्षणावर देखील चर्चा होणार आहे.

तालिबानला निमंत्रण नाही

भारत सरकारे अद्याप तरी दिल्लीत होणाऱ्या या बैठकीसाठी तालिबानला निमंत्रण दिलेलं नाहीये. तालिबानकडून जगाला ज्या अपेक्षा आहेत, त्या अद्यापतरी पूर्ण होताना दिसत नाहीयेत. खासकरुन मानवाधिकाराशी निगडीत मुद्यांवर तालिबानकडून अधिक अपेक्षा आहेत. यामध्ये महिला, मुले आणि अल्पसंख्याकांच्या मानवाधिकारांचा समावेश आहे.

रशियाच्या बैठकीला भारताला निमंत्रण

रशियाने 20 ऑक्टोबर रोजी मॉस्कोमध्ये याचप्रकारची बैठक आयोजित केलीये. या बैठकीसाठी भारतासोबतच तालिबानला देखील निमंत्रण आहे. परराष्ट्र मंत्रालयाचे प्रवक्ते अरिंदम बागची यांनी याबाबतची माहिती देताना म्हटलंय की, भारताला अफगाणिस्तानवरील मॉस्को फोमेर्टच्या बैठकीचं निमंत्रण मिळालं आहे.