जम्मू आणि काश्मीर : जम्मू काश्मीरमधील कुलगाम जिल्ह्यात पोलीस ठाण्यावर शनिवारी अज्ञात अतिरेक्यांकडून हल्ला झाला. या हल्ल्यात पोलिस कॉन्स्टेबल अली मोहद गनी यांचा जागीच मृत्यू झाल्याची घटना घडली आहे. (Terrorist Attack In Jammu Kashmir One Death)

हा कर्मचारी कुलगाम पोलिस स्टेशन येथे कामावर तैनात असताना हा हल्ला झाला असल्याचं समोर आलं आहे. अज्ञात व्यक्तीकडून हल्ला झाल्यानंतर हॉस्पिटलमध्ये दाखल करण्यात आले. परंतु हॉस्पिटलमध्ये पोहचण्याआधीच त्याचा मृत्यू झाला होता. त्यानंतर सुरक्षा दलाने त्या ठिकाणी घेराव घालून शोधमोहीम चालू केली आहे. अजूनपर्यंत अतिरेक्यांचा शोध लागला नसून शोध सुरु असल्याचं सुरक्षा अधिकाऱ्यांनी सांगितले.

दक्षिण काश्मीरच्या याच भागात मागच्या तीन आठवड्यांपूर्वी सुरक्षा दलाच्या चकमकीत एक अतिरेकी ठार केला होता. त्यानंतर आज (शनिवारी) ही घटना घडल्याने परिसरात धोक्याचे वातावरण निर्माण झाले आहे.

* सुरक्षा दलाच्या जवानांवर ग्रेनेड हल्ला

जम्मू काश्मीरच्या श्रीनगरमधील महाराजा बाजार या भागात याआधी सुरक्षा जवानांवर अतिरेक्यांकडून ग्रेनेड हल्ला करण्यात आला होता. या हल्ल्यात कोणतीही जिवितहानी झाली नसून एकही जखमी झाले नसल्याचे पोलिसांनी सांगितले.

हा हल्ला दुपारी साडेचारच्या सुमारास झाला आहे. CRPF आणि पोलिस दलांच्या जवानांवर अतिरेक्यांनी हल्ला केल्याचं पोलिस अधिकाऱ्यांनी सांगितले. या परिसराची नाकाबंदी केली असून शोधमोहीम चालू असल्याचंही अधिकाऱ्यांनी सागितलं.