Karnataka Hijab Controversy : हिजाबच्या वादावरून (Karnataka Hijab Disputes) कर्नाटकात राजकारण चांगलंच तापलंय. सत्ताधारी भाजप (BJP) आणि काँग्रेस पक्ष (Congress Party) आमनेसामने आहेत. कर्नाटक भाजपनं (Karnataka BJP) ट्विट केलंय की, या हिजाब वादामागं काँग्रेसचा तर 'हात' नाही ना? कारण, हायकोर्टात हिजाबच्या बाजूनं युक्तिवाद करणारे वकील काँग्रेसच्या लीगल सेलचे प्रतिनिधी आहेत. त्यामुळं काँग्रेसनंच हा कट रचल्याचा आरोप भाजपनं केलाय. समाजांत फुट पाडण्याचं कारस्थान काँग्रेसकडून केलंय जातंय, असा आरोपही त्यांनी केलाय.

भाजपच्या आरोपाला उत्तर देताना वकील देवदत्त कामत (Adv. Devadatt Kamat) म्हणाले, मी सुदैवानं एका स्वतंत्र देशात राहतोय. याचा मला अभिमान आहे आणि भाजपकडून होत असलेले आरोप बिनबुडाचे आहेत. त्यामुळं माझ्या निवडीवर कोणताही राजकीय पक्ष प्रश्नचिन्ह उपस्थित करु शकत नाही, असं त्यांनी नमूद केलंय. भाजप आयटी सेलचे प्रभारी अमित मालवीय (Amit Malviya) यांनी म्हंटलंय की, 'कर्नाटकात आपण जे काही पाहत आहोत, ते खूप वाईट आहे. धर्माच्या नावाखाली तरुण मुलींना शिक्षणाऐवजी हिजाब निवडण्यास सांगितलं जातंय, हेही चिंताजनक आहे.'

काय आहे वाद?

मंगळवारी उडुपी जिल्ह्यातील मणिपाल येथील महात्मा गांधी मेमोरियल कॉलेजमध्ये (Mahatma Gandhi Memorial College) भगवी शाल आणि हिजाब घातलेल्या विद्यार्थिनींच्या दोन गटांनी एकमेकांच्या विरोधात घोषणा दिल्यानं तणाव वाढला. सोशल मीडियावर व्हायरल झालेल्या एका व्हिडिओत मुलांचा एक गट मंड्यामध्ये हिजाब परिधान केलेल्या मुलीसोबत गैरवर्तन करताना दिसत आहे. मात्र, सोशल मीडियावर या मुलीच्या बाजूनं समर्थनाचा वर्षाव झाला. हिजाब घालण्याच्या मागणीसाठी आपला विरोध सुरू ठेवण्याचा आग्रह धरणाऱ्या मुलीनं सांगितलं, की तिला शिक्षकांचा पाठिंबा आहे. ज्या मुलांनी तिला रोखलं, ते बाहेरचे असल्याचा दावा तिनं केलाय.