कानपूर - उत्तर प्रदेशच्या कानपूर जिल्ह्यात शनिवारी रात्री उशिरा एक मोठा अपघात झाला. या अपघातात 40 भाविकांनी भरलेली ट्रॅक्टर-ट्रॉली तलावात कोसळली. ट्रॉलीतील सर्व भाविक तलावाच्या पाण्यात बुडाले. अपघातानंतर भाविकांमध्ये एकच खळबळ उडाली. आतापर्यंत 27 जणांचा मृत्यू झाला असून दोन डझनहून अधिक जण जखमी झाले आहेत.

अपघातातील अनेकांना गंभीर अवस्थेत रुग्णालयात पाठवण्यात आले आहे. सहा पोलिस ठाण्यांचा फौजफाटा घटनास्थळी पोहोचला आहे. स्थानिक लोकांच्या मदतीने जखमींना तलावातून बाहेर काढून रुग्णालयात पाठवण्यात येत आहे.

या दुर्घटनेबद्दल शोक व्यक्त करत मुख्यमंत्र्यांनी जखमींवर योग्य उपचार करण्याचे निर्देश अधिकाऱ्यांना दिले आहेत.

कोर्टा गावात राहणारा राजू निषाद शनिवारी आपल्या एका वर्षाच्या मुलाचे जावळं करण्यासाठी कुटुंबातील 35-40 लोकांसह उन्नाव येथील बक्सर घाट येथील चंद्रिका देवी मंदिरात गेले होते. सर्वजण ट्रॅक्टर ट्रॉलीमध्ये बसले होते. शनिवारी रात्री सर्वजण परतत असताना साध ते गंभीरपूर गावादरम्यान ट्रॅक्टर-ट्रॉली अनियंत्रित होऊन तलावात उलटली. रात्री 9 वाजेपर्यंत पोलिसांनी 22 मृतदेह बाहेर काढले होते. तर रुग्णालयात पाच जणांचा मृत्यू झाला. तलावात अजूनही भाविकांचा शोध सुरू आहे.