नवी दिल्ली : पंजाब नॅशनल बँकेत कोट्यवधींचा गैरव्यवहार झाला. या गैरव्यवहारानंतर परदेशात पसार झालेला हिरे व्यावसायिक मेहुल चोक्सीच्या प्रत्यार्पणसंबंधी सक्तवसुली संचालनालयाला (ईडी) मोठे यश मिळाले आहे. 'ईडी'ने मेहुल चोक्सीचा साथीदार दीपक कुलकर्णीला अटक केली आहे.

दीपक कुलकर्णी हाँगकाँगहून परतत असताना कोलकाता विमानतळावरून ईडीच्या अधिकाऱ्यांनी त्याला अटक केली. दीपक कुलकर्णी हा हाँगकाँग येथे सुरु असलेल्या एका बनावट कंपनीचा संचालक आहे. केंद्रीय अन्वेषण विभाग (सीबीआय) आणि ईडीने यापूर्वी कुलकर्णीविरोधात 'लूक आऊट नोटीस' जारी केली होती. तसेच यापूर्वी 31 ऑक्टोबरला मेहुल चोक्सीने सांगितले होते, की मी आजारी असल्याने 41 तासांचा प्रवास करून भारतात येऊ शकत नाही. ईडीकडून फरारी आर्थिक गुन्हेगार घोषित केल्याबद्दल विरोध दर्शविला होता. तसेच न्यायालयाने याप्रकरणी ईडीला उत्तर देण्याचे आदेश दिले आहेत. याप्रकरणाची पुढील सुनावणी 17 नोव्हेंबरला होणार आहे.

दरम्यान, 'मनी लाँड्रिंग अॅक्ट'च्या विशेष न्यायालयात 10 पैकी काही पत्रांमध्ये त्यांनी सांगितले, की 41 तासांचा मोठा प्रवास करुन भारतात येऊ शकत नाही.