नवी दिल्ली - कोरोनाचा संसर्ग मोठ्या प्रमाणावर असलेल्या भागात घरोघर जाऊन सर्वेक्षण करावे, असा सल्ला केंद्रीय आरोग्य मंत्रालयाने दहा राज्यांतील ३८ जिल्ह्यांमधील ४५ स्थानिक स्वराज्य संस्थांना आज दिला. त्याचबरोबर जास्तीत जास्त चाचण्या कराव्यात आणि संसर्ग रोखण्यासाठी स्वतःहून देखरेख वाढवावी, असा सल्लाही केंद्राने दिला आहे. 

ताज्या बातम्यांसाठी डाऊनलोड करा ई-सकाळचे ऍप 

केंद्रीय आरोग्य सचिव प्रीती सुदान यांनी आज वरिष्ठ अधिकाऱ्यांच्यासह व्हिडिओ कॉन्फरन्सिंगद्वारे विविध जिल्हाधिकारी, महापालिका आयुक्त, जिल्हा रुग्णालयांचे अधीक्षक आमि वैद्यकीय महाविद्यालयांचे प्रमुख अशा ४५ महापालिकांतील अधिकाऱ्यांशी चर्चा केली. यात महाराष्ट्र, तेलंगण, तमिळनाडू, राजस्थान, हरियाना, गुजरात, जम्मू-काश्‍मीर, कर्नाटक, उत्तराखंड आणि मध्य प्रदेशातील महापालिकांचा समावेश होता. महाराष्ट्रातील मुंबई, पुणे, ठाणे आणि नाशिक जिल्ह्यांतील महापालिका आणि नगर पालिकांच्या अधिकाऱ्यांचा समावेश होता. 

पुण्याच्या बातम्या वाचण्यासाठी येथे  क्लिक करा

लॉकडाउनमधील निर्बंधात आता विविध सवलती देण्यात येत आहेत. त्या पार्श्‍वभूमीवर राज्यांनी येत्या काही महिन्यांसाठी आता जिल्हानिहाय योजना तयार करावी, अशी सूचना केंद्रीय आरोग्य मंत्रालयाने केली आहे. लोकसंख्येची घनता जास्त असलेल्या नागरी भागांत वाढत चाललेला संसर्ग, सामायिक नागरी सुविधाचा वापर, घरोघर जाऊन सर्वेक्षणाचे महत्त्व, तातडीने चाचण्या घेणे, रुग्णांना योग्य उपचार आणि कंटेन्मेंट भागात संसर्ग वाढू नये यासाठी करायच्या उपाययोजना आदी मुद्द्यांवर या बैठकीच चर्चा झाली. 

आरोग्यासाठीच्या पायभूत सुविधा निर्माण करण्यावर भर देण्यात यावा, निरीक्षणासाठी आवश्‍यक तेवढी पथके तयार करावीत, तसेच रुग्णालयात किती खाटा उपलब्ध आहेत, याची माहिती सर्वांना कळावी यासाठीची यंत्रणा तयार करावी, नागरिकांच्या मदतीसाठी रुग्णालयात वरिष्ठ अधिकाऱ्याची नेमणूक करावी, अशा सूचनाही आरोग्य मंत्रालयातर्फे करण्यात आल्या. 

इतर बातम्या वाचण्यासाठी येथे क्लिक करा

आरोग्य मंत्रालयाच्या सूचना 
- एकापेक्षा जास्त आजार असलेल्या ज्येष्ठांची विशेष काळजी घ्या 
- कोरोनाचा संसर्ग होण्यास कारणीभूत असलेले संपर्क शोधा 
- चाचण्यांची संख्या वाढवा 
- कोरोनाच्या संसर्गाची लक्षणे असलेल्यांवर रुग्णालयात तातडीने उपचार करा 
- मृत्यूदर कमी होण्यासाठी वेळेत उपचार मिळण्यासाठी योग्यवेळी निदान करण्याची व्यवस्था निर्माण करावी 
- चाचण्यांचे निकाल लवकर मिळण्यासाठी प्रयोगशाळांनी प्रयत्न करावेत. 
- नागरिकांमध्ये आरोग्य सेवेवरील विश्‍वास कायम राहावा यासाठी लोकप्रतिनिधींची मदत घ्यावी.