Monkeypox : देशात मंकीपॉक्सची दुसरा रुग्ण आढळल्यानंतर केंद्र सरकार सतर्क झाले आहे. याचाच भाग म्हणून केंद्राने आंतरराष्ट्रीय विमानतळ आणि बंदरांवर सध्याच्या आरोग्य स्थितीच्या आढावा घेण्यासाठी आज बैठक घेतली. यानंतर केंद्र सरकारने विमानतळ आणि बंदरांवर देशात प्रवेश करणाऱ्या नागरिकांचे स्क्रीनिंग करण्याच्या सूचना दिल्या आहेत. जेणेकरून मंकीपॉक्सचे रुग्ण वेळेत ओळखून त्यांच्यावर उपचार करता येतील. या बैठकीला विमानतळ आणि बंदर यासंबंधी आरोग्य अधिकारी उपस्थित होते.

आरोग्य आणि कुटुंब कल्याण मंत्रालयाने सांगितले की, मंकीपॉक्स रोगाचा धोका कमी करण्यासाठी राज्ये, विमानतळ आणि बंदरांच्या आरोग्य अधिकाऱ्यांना सर्व आंतरराष्ट्रीय प्रवाश्यांची आरोग्य तपासणी करण्याची सूचना देण्यात आली आहे. केंद्रीय आरोग्य मंत्रालयाच्या मंकीपॉक्स रोगाच्या व्यवस्थापनासाठी मार्गदर्शक तत्त्वांनुसार, माकडपॉक्स रोगाचे क्लिनिकल व्यवस्थापन आणि उपचारांचा सल्ला देण्यात आला आहे. तसेच, आंतरराष्ट्रीय बंदरे आणि विमानतळांवर इमिग्रेशन सारख्या इतर एजन्सीशी समन्वय साधण्याचा सल्ला देण्यात आला आहे.

आज देशात मंकीपॉक्सचा दुसरा रुग्ण आढळला

आज देशात मंकीपॉक्सचा दुसरा रुग्ण आढळून आला आहे. केरळच्या आरोग्य मंत्री वीणा जॉर्ज यांनी सोमवारी सांगितले की, गेल्या आठवड्यात दुबईहून राज्यात आलेल्या 31 वर्षीय व्यक्तीला मंकीपॉक्सची लागण झाली आहे. याआधीही केरळमधूनच मंकीपॉक्सचे प्रकरण समोर आले होते. राज्यातील तसेच देशात मंकीपॉक्सची ही दुसरी घटना आहे. आरोग्यमंत्र्यांनी सांगितले की, 13 जुलै रोजी केरळला पोहोचलेला रुग्ण कन्नूरचा रहिवासी आहे आणि तिथल्या परियाराम मेडिकल कॉलेजमध्ये त्याच्यावर उपचार सुरू आहेत. या व्यक्तीची प्रकृती स्थिर असल्याचे त्यांनी सांगितले. तसेच रुग्णाच्या जवळच्या संपर्कात असलेल्या सर्वांवर बारकाईने लक्ष ठेवले जात आहे.

याआधी गुरुवारी भारतात मंकीपॉक्सचे पहिले प्रकरण देशात नोंदवले गेले होते. त्यानंतर केंद्रीय पथक केरळला पाठवण्यात आले. पहिला रुग्ण संयुक्त अरब अमिराती (UAE) मधून 12 जुलै रोजी परतला होता. केरळमध्ये मंकीपॉक्सची प्रकरणे समोर आल्यानंतर तिरुवनंतपुरम, कोची, कोझिकोड आणि कन्नूर आंतरराष्ट्रीय विमानतळांवर हेल्प डेस्क सुरू करण्यात आले आहेत. जगातील मंकीपॉक्सची वाढती प्रकरणे पाहता भारताने मे महिन्यातच मंकीपॉक्सचा सामना करण्यासाठी मार्गदर्शक तत्त्वे तयार केली होती.