नवी दिल्ली : भारताचे पहिले गृहमंत्री सरदार वल्लभभाई पटेल यांची १४७ वी जयंती ३१ ऑक्टोबर रोजी (सोमवारी) भारतीय जनता पक्ष व मोदी सरकार यंदा जोरात साजरी करणार आहे. ‘एकता दिवसा’निमित्त संसदेपासून रस्त्यापर्यंत विविध कार्यक्रमांचा जल्लोष करण्यात येणार आहे. सरदार पटेल यांच्या जयंतीनिमित्त संसदेत सोमवारी सकाळी विशेष कार्यक्रम होईल. लोकसभाध्यक्ष ओम बिर्ला, पंतप्रधान नरेंद्र मोदी, गृहमंत्री अमित शहा व अन्य मंत्री सेंट्रल हॉलमधील पटेल यांच्या प्रतिमेला अभिवादन करतील. दरम्यान, पंतप्रधान नरेंद्र मोदी गुजरातमधील केवडिया येथे जातील आणि सरदार सरोवर येथील पटेल यांच्या भव्य पुतळ्यास आदरांजली वाहतील. यावेळी आदिवासी मुलांचे संगीत पथक पंतप्रधानांसमोर एक विशेष सादरीकरण करणार आहेत, अशी माहिती ‘पीएमओ’ने दिली.

पंतप्रधान केवडियात

पंतप्रधान मोदी केवडियातील ‘एकता दिवस’च्या संचलनातही सहभागी होतील आणि लाल बहादूर शास्त्री नॅशनल अॅकॅडमी ऑफ अॅडमिनिस्ट्रेशनमध्ये पायाभूत अभ्यासक्रमाचे प्रशिक्षण घेणाऱ्या प्रशिक्षणार्थी अधिकाऱ्यांशी संवाद साधतील. यादरम्यान बनासकांठा जिल्ह्यातील अंबाजी शहरातील आदिवासी मुलांचे बँड पथक पंतप्रधानांसमोर सादरीकरण करणार आहे. ही मुले एकेकाळी अंबाजी देवी मंदिरासमोर राहत असत. अंबाजी येथील श्रीशक्ती सेवा केंद्र नावाच्या स्वयंसेवी संस्थेने या मुलांच्या पुनर्वसनाची जबाबदारी उचलली व त्यांच्यातील संगीताचे गुणही पारखून त्यांना संगीत शिक्षण दिले. यातून बँड पथक तयार झाले. मागच्या गुजरात दौऱ्यात बँडच्या सादरीकरणाने मोदी प्रभावित झाले व त्यांनी त्यांचे कौतुक केले होते.