कोलकता - सीतलकुचीमधील हिंसाचाराबाबत प्रक्षोभक वक्तव्य केल्याप्रकरणी भाजप नेते सायंतन बसू यांना निवडणूक आयोगाने नोटीस बजावली आहे. त्यांनी एकाला मारले तर आम्ही चार जणांचा बळी घेऊ असे म्हणताना त्यांनी शोलेतील डायलॉगचा संदर्भ दिला होता.

सीतलकुचीमध्ये प्रथमच मतदानास आलेला भाजप कार्यकर्ता आनंद बर्मन अज्ञात व्यक्तींनी केलेल्या गोळीबारात मृत्युमुखी पडला. त्यानंतर दुपारी केंद्रीय औद्योगिक सुरक्षा दलाच्या जवानांच्या गोळीबारात चार व्यक्ती मृत्युमुखी पडल्या. या पार्श्वभूमीवर बसू यांच्या वक्तव्याचा मजकूर नोटिशीला जोडण्यात आला.

बसू यांनी प्रक्षोभक वक्तव्य केले होते. ते म्हणाले होते की, मी, सायंतन बसू, तुम्हाला हे बजावण्यास आलो आहे की तुम्ही अकारण आव्हान देऊ नका. आम्ही सीतलकुचीचा खेळ खेळू. त्यांनी आधी सकाळी १८ वर्षांचा आनंद बर्मनला मारले. भाजपच्या शाखाप्रमुखांचा तो भाऊ होता. आम्हाला फार वाट पाहावी लागली नाही. त्यांच्यातील चार जणांना यमसदनास धाडण्यात आले. शोले चित्रपटातील हा डायलॉग तुम्हाला ठाऊक आहे. तुम्ही एक मारलात तर आम्ही चार मारू. सीतलकुची गाव याचे साक्षीदार बनले.

कारवाईचा इशारा

हे वक्तव्य आचारसंहिता, लोकप्रतिनिधित्व कायदा आणि भारतीय दंडसंहितेचा भंग करते असा ठपका आयोगाने ठेवला. हे वक्तव्य म्हणजे बंगाल आणि राज्यातील जनतेला खुली धमकी असल्याचे आयोगाने नोटिशीत नमूद केले आहे. खुलासा केला नाही तर आणखी संदर्भ न देता कारवाई केली जाईल, असेही बजावण्यात आले.