नवी दिल्ली : भारताचे राष्ट्रीय सुरक्षा सल्लागार अजित डोभाल (NSA Ajit Doval) यांच्या घरात एक व्यक्ती जबरदस्तीने घुसण्याचा प्रयत्न करत होता. यामुळे अजित डोभाल यांच्या निवसस्थानाजवळ एकच गोंधळ निर्माण झाला. दिल्ली पोलिसांनी दिलेल्या माहितीनुसार या व्यक्तीला ताब्यात घेतले असून त्याची कसून चौकशी केली जात आहे. ही घटना आज ( दि. 16 ) रोजी घडली. (Ajit Doval security breached)

आतापर्यंत मिळालेल्या माहितीनुसार अजित डोभाल यांच्या घरात घुसण्याचा प्रयत्न करणारा व्यक्ती तपासादरम्यान असंबंध वक्तव्ये करत आहे. तो म्हणत होता की त्याला अजित डोभाल (Ajit Doval) यांना भेटायचे आहे. त्याची अडचण तेच सोडवू शकतात. पोलिसांच्या प्राथमिक तपासात असे आढळून आले आहे की हा व्यक्ती मानसिक रोगी वाटत आहे. तो एक भाड्याची गाडी चावलत होता.

अजित डोभाल हे दिल्लीतील एका अत्यंत सुरक्षित भागात राहतात. ते ल्युटियन्स झोनमधील 5 जनपथ बंगल्यात राहतात. त्यांच्या आधी या बंगल्यात माजी पंतप्रधान इंद्र कुमार गुजराल रहात होते. त्यांच्या बंगल्याशेजारी माजी पंतप्रधान मनमोहन सिंग (Manmohan Singh) आणि काँग्रेस अध्यक्षा सोनिया गांधी (Sonia Gandhi) यांचा बंगला आहे.