भुवनेश्‍वर -  ‘ऑलिव्ह रिडले’ कासवांच्या प्रजननासाठी प्रसिद्ध असलेल्या ओडिशातील केंद्रपाडा या जिल्ह्यातील गहिरमाथा आणि ऋषिकुल्य दरम्यान गेल्या महिनाभरात चार कोटींपेक्षा जास्त कासवांच्या पिल्लांनी अंड्यांमधून बाहेर पडून समुद्राकडे धाव घेतली. या वर्षीच्या ‘ऑलिव्ह रिडले’चा प्रजनन हंगामाची सांगता झाली असल्याचे सांगण्यात आले.

ताज्या बातम्यांसाठी डाऊनलोड करा ई-सकाळचे ऍप  

गहिरमाथा येथील ‘नासी - २’ बेट आणि ऋषिकुल्य दरम्‍यानच्या किनारी भागात मे महिन्याच्या दुसऱ्या व तिसऱ्या आठवड्यात ‘ऑलिव्ह रिडले’ कासवांनी घातलेल्या अंड्यांतून दोन कोटी पिले बाहेर पडली असल्याचे राज्याच्या वन्यजीव व वन विभागाने सांगितले. ऋषिकुल्य खोऱ्यातील गोखरकुडा किनाऱ्यावरही दोन कोटींपेक्षा जास्त पिले बाहेर पडली आहेत. 

पुण्याच्या बातम्या वाचण्यासाठी येथे  क्लिक करा

राजनगर खारफुटी वन विभागाचे विभागीय वन अधिकारी विकास रंजन दास म्हणाले की, किनाऱ्याची धूप, पाऊस अशा बाबी लक्षात घेता  ‘ऑलिव्ह रिडले’ कासवांनी घातलेली अंडी उबण्याचे प्रमाण यंदा ७० टक्के होते. तसेच यंदा कोणताही अडथळा नसल्याने पिले सहजपणे बंगालच्या उपसागरापर्यंत पोचू शकली.

‘ऑलिव्ह रिडले’च्या अंड्यांचे प्राणी व माणसापासून रक्षण करण्यासाठी वनविभागाने ऋषिकुल्य किनाऱ्यावर पाच किलोमीटरपर्यंत धातूच्या तारेचे कुंपण घातलेले आहे.
- विकास रंजन दास,  विभागीय वन अधिकारी, राजनगर