पणजी : येथील "अटल मतदान केंद्र कार्यकर्ता' संमेलनात आजारी असलेले मुख्यमंत्री मनोहर पर्रीकर दोनच मिनिटे मोठ्या कष्टाने बोलले आणि त्यांनी भाजपच्या कार्यकर्त्यांत जोश आणला. यापूर्वी गेल्या वर्षी 15 मे रोजी कार्यकर्ता संमेलन झाले होते, त्या वेळी पर्रीकर अमेरिकेत होते. त्या वेळी त्यांच्या संदेशाची ध्वनिचित्रफीत दाखविण्यात आली होती. 

भाजपचे राष्ट्रीय अध्यक्ष अमित शहा यांच्या प्रमुख उपस्थितीत हे संमेलन बांबोळी येथील ऍथलेटिक्‍स स्टेडियमच्या मैदानावर झाले. या संमेलनाला वीस मिनिटांसाठी पर्रीकर उपस्थित होते. दोन मिनिटे ते बोलले. आपण मोठे भाषण निवडणुकीसाठी राखून ठेवतो असे त्यांनी सांगितले. ते सभास्थळी आले तेव्हा सर्वांनी उठून त्यांचे स्वागत केले. त्यांचे भाषण संपले त्या वेळी टाळ्या थांबण्याचे नाव घेत नव्हत्या. शहा यांनीही आपल्या भाषणात पर्रीकर यांचे कार्यकर्त्यांवर असलेले प्रेम शब्दबद्ध केले.

ते म्हणाले, की येताना मी मुख्यमंत्र्यांच्या निवासस्थानी गेलो होतो. त्यांना मी कष्ट घेऊन येऊ नका असे सांगितले. पण त्यांनी माझा कार्यकर्ता आज येणार आहे, त्याच्याशी संवाद साधण्यासाठी दोन मिनिटांसाठी का होईना मी येतो असे सांगितले. त्यांनी तो हट्ट पूर्ण केला. असे नेते-कार्यकर्ते जोवर आहेत, तोवर भाजपला कोणी पराभूत करू शकणार नाही.