नवी दिल्ली : संपूर्ण देशात पोलिसांची प्रति मा नकारात्मक बनली असून सामान्य जनतेप्रती पोलिसांची वर्तणूक अनेकदा असंवेदनशील असल्याचे ताशेरे संसदीय समितीने ओढले आहेत. आयपीएस अधिकाऱ्यांविरोधातही भ्रष्टाचाराचे गुन्हे दाखल करावे लागल्याबाबत समितीने चिंता व्यक्त केली आहे.

गृह खात्यासंबंधीच्या संसदीय स्थायी समितीने हा अहवाल तयार केला असून काँग्रेस नेते आनंद शर्मा हे या समितीचे अध्यक्ष आहेत. जनतेच्या मनांत पोलिसांबाबतची प्रतिमा नकारात्मक होत असल्याचे या समितीने संसदेत सादर केलेल्या अहवालात म्हटले आहे. सामान्य जनतेशी पोलिसांची वागणूक असंवेदनशील होत असून गंभीर गुन्ह्याबाबतही ते गांभीर्याने पहात नाहीत, असा संताप अहवालात व्यक्त करण्यात आला आहे. पोलिसांच्या अशा वर्तणुकीमागे अनेक कारणे असू शकतात, असे समितीने कबूल केले असले तरी, पोलिसांची वर्तणुक सुधारण्यासाठी त्यांना योग्य प्रशिक्षण देण्याची गरज असल्याचे अहवालात नमूद करण्यात आले आहे.

पोलिसांनी त्यांचा ‘हक्का’वर आधारित दृष्टीकोन बदलून तो अधिकारांवर आधारित केल्यास बराच सकारात्मक बदल घडून येईल, असा विश्‍वास संसदीय समितीने व्यक्त केला आहे. प्रशिक्षण संस्थांनीही ही बाब ध्यानात ठेवत त्यांच्या प्रशिक्षण कार्यक्रमांमध्ये सुधारणा करावी, असा सल्ला देण्यात आला आहे.

कामगिरीचे मूल्यांकन करा

अनेक आयपीएस अधिकाऱ्यांविरोधात भ्रष्टाचाराच्या तक्रारी दाखल केल्या जात असल्याबद्दल संसदीय समितीने चिंता व्यक्त केली आहे. त्यामुळेच, जिथे आयपीएस अधिकाऱ्यांचे प्रशिक्षण होते त्या हैदराबाद येथील सरदार वल्लभभाई पटेल राष्ट्रीय पोलिस अकादमीला समितीने एक सल्ला दिला आहे. अकादमीमधील प्रशिक्षण संपवून प्रत्यक्ष काम करण्याचा प्रशिक्षणकाळ सुरु झाल्यावर अकादमीने या कालावधीत त्या अधिकाऱ्यांच्या नियुक्तीच्या ठिकाणी जाऊन त्यांच्या कामाचे मूल्यमापन करावे, असे समितीने सुचविले आहे.